Elbasy kitaphanasynda sýretshi Anar Ábjanovanyń «Alataý jaýharlary» atty jeke kórmesi ashyldy. Bul is-shara Tuńǵysh Prezıdent kúnine arnalǵan kórmeler serııasynyń shymyldyǵyn túrdi. Sondaı-aq Elbasy kitaphanasynyń jınaǵynda turǵan tanymal avtorlardyń shyǵarmashylyǵyn nasıhattaýǵa baǵyttalǵan «Táýelsizdiktiń mádenı kody» jobasy aıasynda uıymdastyryldy, dep habarlaıdy Egemen.kz.
Taqyryptyq kórme úshin qylqalam sheberi arnaıy 30-dan astam sýret salǵan. A.Ábjanovanyń týyndylarynan onyń sheberligin ǵana emes, týǵan ólkesine degen súıispenshiligi men tabıǵatqa tańdanysyn da ańǵarýǵa bolady. Sýretshi óziniń shyǵarmashylyǵy arqyly kórermendi tabıǵatty baǵalaýǵa jáne qorǵaýǵa shaqyrady.
Is-sharaǵa shet memleketterdiń elshileri men dıplomatııalyq korpýstarynyń ókilderi, sýretshiler, ónertanýshylar men óner qaıratkerleri, QazUО́Ý kórkemsýret fakýltetiniń oqytýshylary, Nur-Sultan qalasyndaǵy Balalar kórkemsýret mektebi – IýNESKO klýby men «AVANGARD» kórkemsýret mektebiniń pedagogtary men oqýshylary qatysty.
– Anar Ábjanovanyń eńbekterinde Elbasynyń «Uly dalanyń jeti qyry» maqalasynyń mazmuny shyǵarmashylyq negizde kórinis tapqan. N.Á. Nazarbaevtyń maqalalary óner tilinde jaqsy sýrettelgen. Búgin munda beıneleý ónerin baǵalaıtyn jandar jınaldy. Osy jerdegi kózdiń jaýyn alatyn keremet dúnıelerdi Anar búgingi kórme úshin arnaıy saldy, – dedi kórmeniń saltanatty ashylýynda Elbasy kitaphanasynyń dırektory Baqytjan Temirbolat. Ol avtorǵa «Nursultan Nazarbaev. О́mirbaıan» kitabyn tartý etti.
Sýretshiniń aıtýynsha, qazaqstandyq qyzǵaldaqtar taqyrybyna arnalǵan jumystar toptamasyn jasaý ıdeıasyna Elbasynyń «Uly dalanyń jeti qyry» maqalasy shabyt bergen. Onda N.Á. Nazarbaev Qazaqstan alma men qyzǵaldaqtyń tarıhı otany ekenin atap ótken. Qazaqstan Respýblıkasy Táýelsizdiginiń 30 jyldyǵyn merekeleý jylynda Elbasynyń baǵdarlamalyq maqalasynyń mazmuny «qarapaıym, biraq búkil álem úshin ózindik mán-mańyzy zor» qyzǵaldaqtarǵa arnalǵan jumystardyń jaryq kórýine muryndyq boldy. N.Á. Nazarbaevtyń «ósimdikter áleminiń jaýhary» ataǵan Greıg qyzǵaldaqtarynyń ásemdigi Anar Ábjanovany Ile Alataýyna shyqqan kezde tań qaldyrǵan. Greıg qyzǵaldaqtary beınelengen jumystar sıkli Regel, Kolpakovskıı qyzǵaldaqtarynyń sýretterimen tolyqtyrylǵan.
Bıylǵy jyly sýretshiniń shyǵarmashylyǵyna 20 jyl tolady. Anar Ábjanovanyń «Álem – arman qanatynda» atty alǵashqy jeke kórmeleriniń biri 2012 jyly Elbasy kitaphanasynyń alańynda (Tuńǵysh Prezıdent mýzeıinde) «Úkili úmit» shyǵarmashyl jastardy qoldaý jobasy aıasynda ótkizilgen bolatyn.
– Taýlarda ósetin qyzǵaldaqtardyń gúldegen sátin ekiniń biri kóre almaıdy. Bul sırek kezdesetin qubylys. Sulýlyǵyna til jetpeıdi. Men osy keremetti kórip, qaǵazǵa túsire aldym. Tabıǵattyń ózi maǵan senim artqandaı. О́z sýretterim arqyly tabıǵatqa, Qazaqstan taýlary men dalasynyń biregeı sulýlyǵyna uqypty qaraýdy nasıhattaǵym keledi. Qyzyl kitapqa engen ósimdikterdi joımaı, kerisinshe saqtap qalýdy suraımyn, – dedi Anar Ábjanova.
Kórme 11 maýsymǵa deıin jalǵasady. Kórme materıaldarymen Elbasy kitaphanasynyń saıtyndaǵy «Kórmeler», «Jobalar» bóliminen tanysýǵa bolady.