Saýda jáne ıntegrasııa mınıstri Baqyt Sultanov Fınlıandııanyń Syrtqy saýda jáne damý mınıstri Vılle Skınnarımen eki el arasyndaǵy saýda-ekonomıkalyq yntymaqtastyqtyń ózekti máselelerin talqylaý boıynsha kelissózder ótkizdi, dep habarlaıdy Egemen.kz Saýda jáne ıntegrasııa mınıstrliginiń baspasóz qyzmeti taratqan aqparatqa silteme jasap.
Oǵan Fınlıandııa Respýblıkasynyń Qazaqstan Respýblıkasyndaǵy Elshisi Soılı Mıakelıaınen-Býhanıst, sondaı-aq Qazaqstan Respýblıkasynyń Fınlıandııa Respýblıkasyndaǵy Tótenshe jáne О́kiletti Elshisi Janna Sábıtqyzy Sartbaeva qatysty.
Qazaqstan men Fınlıandııa arasynda áriptestik ózara qarym-qatynastardy odan ári damytýdyń tıimdi tetigi jolǵa qoıylǵan. Qazaqstan-Fınlıandııa saýda-ekonomıkalyq yntymaqtastyq jónindegi Úkimetaralyq komıssııasy tabysty jumys isteýde.
- Elder arasyndaǵy taýar aınalymy 2021 jylǵy qańtar-naýryzda $111,2 mln-dy qurady, bul ótken jyldyń sáıkes kezeńimen salystyrǵanda 3,4 ese joǵary. Qazaqstannan Fınlıandııaǵa eksport 2021 jyldyń birinshi toqsanynda 80,8 esege ósip, $86,4 mln qurady. Sonymen qatar, Qazaqstan-Fınlıandııa qarym - qatynastarynyń nyǵaıý perspektıvasy bar, - dedi B. Sultanov.
Qazaqstandyq óndirýshilerdiń artyqshylyqtary týraly aıta otyryp, Baqyt Sultanov elimizde 60-tan astam organıkalyq ónim óndirýshiler týraly habarlady. Olardyń bir bóligi qazirgi ýaqytta Eýropalyq Odaqtyń ýákiletti organdarynda akkredıtteýden ótýde.
Áńgime barysynda mınıstr Fınlıandııanyń joǵary tehnologııalar salasyndaǵy jetistikterimen tanymal ekenin jáne Qazaqstan osy salada tájirıbe almasýǵa jáne yntymaqtastyq ornatýǵa múddeli ekenin atap ótti.
- Qazaqstan tıimdi, yńǵaıly geografııalyq jerde ornalasqan, shekaralas elderdiń naryqtaryna qol jetkize alady. Qazaqstan aýmaǵynda 10 arnaıy ekonomıkalyq aımaq jumys isteıdi. Investorlar úshin jeńildikter bar, úkimet ınvestorlardyń quqyqtaryn qoldaýǵa jáne qorǵaýǵa kepildik beredi. Fın ınvestısııalaryn tartý úshin «Qorǵas» ShYHO áleýetin paıdalanýdy, sondaı-aq ony QHR naryǵyna kóterme-bólshek eksporttaý úshin alań retinde paıdalanýdy usynǵym keledi, - dedi Saýda jáne ıntegrasııa mınıstri.
О́z kezeginde Fınlıandııanyń Syrtqy saýda jáne damý mınıstri V.Skınnarı Reseı Federasııasy men QHR arasyndaǵy qarym-qatynastar aıasynda, sondaı-aq eýropalyq qaýymdastyqpen yntymaqtastyq aıasynda bıznes pen saýdany damytý máselelerin talqylaýǵa kelgenin atap ótti.
- Biz Fınlıandııanyń jetekshi kompanııalarynyń ókilderimen yntymaqtastyqtyń naqty nusqalaryn talqylaý úshin keldik. Fınlıandııanyń joǵary tehnologııalaryn eskere otyryp, biz yntymaqtastyǵymyzdy damytyp, serpilis jasaı alamyz dep oılaımyn. Sondaı-aq biz logıstıka, sıfrlandyrý, bilim berý jáne densaýlyq saqtaý salalaryndaǵy yntymaqtastyqty damytýǵa múddelimiz. Biz saýda seriktesi bolýǵa jáne EO naryǵynda oryn alýǵa Qazaqstandy qoldaýǵa daıynbyz, - dedi V.Skınnarı.
Osyǵan baılanysty, bıznes-toptar arasyndaǵy yntymaqtastyqty jandandyrý maqsatynda qazaqstandyq tarap tutynýshylardy qazaqstandyq jáne fın óndirisiniń ónimderimen tanystyrý úshin onlaın-formatta saýda mıssııalaryn ótkizýdi qarastyrý múmkindigin usyndy.