Ispanııanyń Pontevedra qalasynda ótken ártistik júzýden Álem kýbogy kezeńinde Qazaqstan quramasy eki qola medal enshiledi, dep habarlaıdy Egemen.kz
Júldegerlerdiń biri – Aldııar Ramazanov. Ol erler arasyndaǵy tehnıkalyq baǵdarlamada sátti óner kórsetip, 223,0833 upaı jınap, úshinshi orynǵa ıe boldy.
Bul synda altyn medaldi Fılıppo Pelatı jeńip alsa, kúmis júlde Eneko Sanches Agılar qorjynyna saldy. Al taǵy bir qazaqstandyq sportshy Vıktor Drýzın jarysty besinshi orynmen aıaqtady.
Aıta keterligi, bul Aldııar Ramazanovtyń atalǵan týrnırdegi ekinshi júldesi boldy. Buǵan deıin ol Iаsmına Islamovamen birge aralas juptar arasyndaǵy tehnıkalyq baǵdarlamada qola medal jeńip alǵan edi.
Osylaısha, Qazaqstan quramasy halyqaralyq deńgeıdegi bedeldi jarysta eki qola júlde ıelenip, ártistik júzýdegi joǵary áleýetin taǵy bir márte dáleldedi.