Almaty qalasynda Qazaqstan Respýblıkasynyń Ulttyq ortalyq mýzeıindegi jeldetý jáne aýa baptaý júıesin jańǵyrtý jumystary aıaqtaldy. Joba Memleket basshysynyń tarıhı-mádenı murany saqtaý jáne mýzeılerdiń materıaldyq-tehnıkalyq bazasyn nyǵaıtý jónindegi tapsyrmalaryn iske asyrý aıasynda júzege asyryldy, dep habarlaıdy Egemen.kz
Ortalyq Azııadaǵy eń iri mýzeılerdiń biri sanalatyn mekeme úshin ınjenerlik júıelerdi jańartý aıryqsha mańyzdy. Búginde Ulttyq ortalyq mýzeı qorynda arheologııalyq jádigerler, qoljazbalar, qujattar, óner týyndylary men Qazaqstan tarıhynan syr shertetin ózge de qundy muralardy qosa alǵanda 300 myńnan astam eksponat saqtaýly.
«Mýzeı túni»: Ulttyq ortalyq mýzeıge bir túnde 17 myń adam bardy
Zamanaýı jeldetý jáne aýa baptaý júıesi mýzeı qoryndaǵy jádigerlerdi saqtaý jaǵdaıyn jaqsartýǵa, ekspozısııalyq jumystyń sapasyn arttyrýǵa jáne kelýshilerge, zertteýshiler men mýzeı mamandaryna qolaıly orta qalyptastyrýǵa múmkindik beredi. Jobany júzege asyrý úshin arnaıy merdiger uıym tartylyp, qajetti jabdyqtar eýropalyq óndirýshiden tikeleı satyp alyndy.
Ǵumar Qarashtyń túpnusqa sýreti mýzeıge qoıyldy
Joba Bolat О́temuratov qorynyń qoldaýymen júzege asyryldy. Jumystar 2025 jyldyń qyrkúıeginde bastalyp, 2026 jylǵy 20 mamyrda tolyq aıaqtaldy.