Túrkistan oblysy Maqtaaral aýdanynyń qarııalary aýdan kólemindegi barlyq dúkende ishimdik ataýlynyń satylmaǵanyn qalaıdy, dep habarlaıdy Egemen.kz.
Mundaı usynys-tilekterin olar aýdan ákimi Baqyt Asanovtyń jeke qabyldaýynda jetkizdi.
Qoǵamdyq qabyldaýǵa birneshe aýyldyq okrýgten jınalyp kelgen aqsaqaldar spırttik ishimdik satylymyna tosqaýyl qoıýǵa yqpal etý boıynsha aýdan ákimine ótinish jasady. Al Jasuzaq Sydyqov buǵan deıin ishimdik satýdy toqtatqan eldi mekenderdiń tájirıbesi týraly keńinen áńgimelep ótti. Bul eldi mekenderdiń barlyǵynda bereke-birlik saltanat quryp, qylmys jasaý, jubaılardyń ajyrasýy, kishi buzaqylyq degen atymen joǵalǵan. Mundaı bastamany eń alǵash Maqtaaral aýdanynda Eńbekshi aýyldyq okrýgine qarasty Jantaqsaı eldi mekeniniń qarııalary qolǵa alypty. Qabyldaýǵa kelgenderdiń biri, aýdandyq qoǵamdyq keńestiń tóraǵasy Seıitkerim Meldehanov ózi turatyn Birlik aýyldyq okrýgi Tabysty aýylynda dúken ıeleriniń árbirimen jeke sóılesip, spırttik ishimdik satpaýǵa ýádelerin alǵanyn aıtty. Al Mansurqoja aqsaqal Atakent kentindegi 11 dúken ıelerimen áńgimelesip, araq-sharap satpaýǵa kelisimin alǵan.
Aýdan ákiminiń qoǵamdyq qabyldaýyna kelgen aqsaqaldardyń endigi maqsaty – Maqtaaral aýdanyndaǵy 69 eldi mekenniń barlyǵynda spırttik ishimdik satýdy azaıtý nemese múlde joıý. Osy arqyly aýdanda qylmys sanyn azaıtyp, árbir otbasyǵa qut-bereke darytý. Aqsaqaldar osy maqsatty júzege asyrý úshin aýdan ákiminen spırttik ishimdik satatyn kásipkerlerge yqpal etýdi surandy. Bul oraıda aýdan ákimi Baqyt Asanov qarııalardyń bastamasy óte oryndy ekenin aıtyp, zań aıasynda barynsha qoldaıtynyn jetkizdi. Endigi kezekte saýda oryndarynyń ıeleri, ıaǵnı kásipkerler qarııalardy qoldasa Maqtaaral ishimdik ataýly satylmaıtyn aýdanǵa aınalady.