Qazaqstan óńirlerindegi epıdemııalyq ahýaldy baǵalaý matrısasy boıynsha birde «qyzyl», birde «sary» aımaqtaǵy Shymkentte koronavırýs indetiniń taralý deńgeıi sońǵy táýlikterde 100-den túspeı tur. Shymkent qalasynda 14 mamyr kúni indettiń 102 jaǵdaıy tirkelse, jeksenbide bul kórsetkish bir adamǵa ǵana tómendedi.
Qazirgi tańǵa mamandandyrylǵan ınfeksııalyq stasıonarlarda barlyǵy 1 406 oryn bar, tósektik oryn tolymdyǵy – 46%, 756 oryn bos. Qalalyq densaýlyq saqtaý basqarmasynyń málimetinshe, ınfeksııalyq stasıonarda 650 naýqastyń 320-sy koronavırýstan, 325-si pnevmonııadan emdelýde.
Egý naýqany bastalǵaly 160 myńnan astam adam vaksınalanǵan, onyń 65 myńǵa jýyǵy vaksınanyń eki komponentin aldy. Iá, indetten saqtanýdyń basty joly ekpe saldyrý ekeni mamandar tarapynan únemi eskertilýde. Sonymen qatar úshinshi megapolıste indettiń taralýyna qarsy sharalar keńinen qoldanylýda. Mysaly, qalanyń bas sanıtar dárigeriniń qaýlysymen Shymkentte karantın rejimin jáne koronavırýs ınfeksııasy taralýynyń aldyn alý jónindegi shekteý sharalary 16 mamyrdan bastap epıdemııalyq jaǵdaı turaqtalǵanǵa deıin uzartyldy.
Sondaı-aq úshinshi megapolıste «Ashyq» jobasy keńinen qoldanyla bastady. Qalada halyqqa qyzmet kórsetetin kásipkerlik nysandar jobaǵa sáýirdiń sońynda ótken bolatyn. Bıznes uıymdarynyń karantın kezinde úzdiksiz jumys isteýine jáne adamdardyń COVID-19-ǵa baılanysty dárejesin anyqtaýǵa múmkindik beretin jobaǵa qatysýǵa úshinshi megapolıstegi kásipkerlerden 848 ótinim túsip, onyń ishinde 367-ne QR-kod berilgen, 192 nysan ákimdik saıtyna ornalastyrylǵan. Olardyń qatarynda birneshe fıtnes-klýb, kınoteatr, spa-ortalyq, saýna men basqa da nysandar bar.
ShYMKENT