Búgin Úkimet otyrysynda Densaýlyq saqtaý mınıstri Alekseı Soı Qazaqstanda koronavırýs juqtyrý kórsetkishi 20 paıyzǵa tómendegenin málimdedi, dep habarlaıdy Egemen.kz.
«Qazirgi ýaqytta vırýs juqtyrǵandardyń tómendeýine qatysty oń dınamıka baıqalady jáne epıdemııalyq ahýal birtindep turaqtalyp kele jatyr. Máselen, sońǵy 2 aptada oǵan deıingi eki aptamen salystyrǵanda naýqastaný kórsetkishi 20 paıyzǵa azaıdy», dedi mınıstr.
Mınıstrdiń aıtýynsha, óńirler sheginde 18 mamyrdaǵy jaǵdaıǵa sáıkes, ınfeksııalyq tósek-oryndardyń tolymdylyǵy 36, al reanımasııalyq tósek-oryndardyń tolymdylyǵy 28 paıyzdy qurap otyr.
«Infeksııalyq tósek-oryndardyń eń joǵary tolymdylyǵy Nur-Sultan qalasynda – 49, Almaty oblysynda – 45 paıyz, reanımasııalyq tósek-oryndar tolymdylyǵy Nur-Sultan qalasynda – 52, Almaty qalasynda – 47 paıyzdy quraıdy», dedi Densaýlyq saqtaý mınıstri.