Jambyl óńirinde 68 jastaǵy turǵyn koronavırýstan emdelip shyqty, dep habarlaıdy Egemen.kz.
Jambyl oblysynyń Talas aýdany, Úsharal aýylynyń 68 jastaǵy turǵynynyń dene qyzýy úsh kúnnen beri túspeı, tynys alýy qıyndaǵan soń, naýqas jedel járdem kóligimen ortalyq aýrýhanaǵa jetkiziledi. Tekserý barysynda kompıýterlik tomografııa ókpeniń 50 paıyzy zaqymdalǵanyn anyqtap, oǵan ekijaqty polısegmentarly pnevmonııa dıagnozy qoıylady.
Sondaı-aq oblystyq densaýlyq saqtaý basqarmasynyń málimetinshe, pasıentte stenokardııa, búırektiń basym zaqymdanýymen arterııalyq gıpertenzııa jáne qan aınalymynyń buzylýy sııaqty ilespe aýrýlar bolǵan.
Naýqas shuǵyl túrde jansaqtaý bólimine jatqyzylyp, oǵan qosymsha respıratorlyq qoldaý kórsetilgen. Araǵa bes kún salyp jaǵdaıy jaqsarǵan soń, arnaıy ortaq bólmege aýystyrylǵan. Dárigerlerdiń kómeginiń nátıjesinde zeınetker 15 kún ishinde syrqatynan tolyq aıyǵyp shyqty.
«Men barlyq medısına qyzmetkerlerine alǵys aıtamyn. Oblys ortalyǵyna barmaı-aq, aýdandyq aýrýhanada qajetti em-dom alyp, otbasyma aman-esen oraldym. Aq halatty abzal jandarǵa baqyt, densaýlyq jáne osy pandemııamen kúresýde shydamdylyq tileımin. Eńbekterińiz jana bersin!», deıdi ol.
«Adamnyń aýrýdan jazylýy onyń ishki jaǵdaıyna, onyń ómir súrýge, otbasyna, jaqyndaryna oralýǵa degen nıetine tikeleı baılanysty. Bul kisi bizdiń stasıonarymyzdaǵy ómirge qushtar naýqastardyń biri bolǵan, sondyqtan da ol koronavırýs indetin jeńdi», deıdi emdeýshi dáriger Tolqyn Jańabaı.
Jambyl oblysy