Elordadaǵy Qazaq gýmanıtarlyq zań ýnıversıtetinde Qazaqstan Jastar kongresi men Qazaqstan halqy Assambleıasy birlesip qolǵa alǵan “Jastar – Qazaqstan halqy birligi úshin” degen taqyrypta jalpyulttyq forým óz jumysyn bastady.
Bilim jáne ǵylym mınıstrliginiń qoldaýymen uıymdastyrylǵan bul sharanyń negizgi ózegi – jastardyń boıyna rýhanı-adamgershilik qundylyqtardy myqtap sińirý arqyly patrıotızmdi nyǵaıtý. Keshe, ıaǵnı forýmnyń alǵashqy kúni “Urpaqtar sabaqtastyǵy” degen atpen jastardyń elimizdiń beldi saıasat jáne mádenıet qaıratkerlerimen, zııaly qaýym ókilderimen kezdesýi ótti. Kezdesýge kórnekti aqyn, qoǵam qaıratkeri Muhtar Shahanov, Parlament Senaty men Májilisiniń depýtattary Ǵarıfolla Esim men Bekbolat Tileýhan, Ulttyq ǵarysh agenttigi tóraǵasynyń orynbasary Meıirbek Moldabekov, professor Rústem Omarov qatysty.
Basqosý kezinde urpaqtar sabaqtastyǵyn saqtaý, rýhanı-adamgershilik qundylyqtar, bilim, ómirlik fılosofııa, qazaq halqynyń mádenı, tildik erekshelikteri tóńireginde pikir almasyldy. Máselen, Ǵarıfolla Esim urpaqtar sabaqtastyǵy degen máseleniń aıryqshy mańyzǵa ıe ekendigine toqtaldy. “Biz – 20 ǵasyrdyń adamdarymyz. Sol ǵasyrda ósip, sol ǵasyrda tárbıelenip shyqtyq. Al sender 21 ǵasyrdyń urpaǵysyńdar. Biz senderge óz ǵasyrymyzdyń terezesinen qarap turmyz. Sondyqtan, elimizdiń, onyń bolashaǵynyń qandaı bolmaǵy, qandaı arnaǵa túsetini senderdiń qoldaryńda. Bul jerde urpaqtar sabaqtastyǵy degen de úlken ról atqarady. Eger, urpaqtar sabaqtastyǵy úzilse, biz múlde basqa arnaǵa ketip qalamyz”, degen oıyn jetkizdi Senat depýtaty.
Bul kúni forýmǵa qatysýshylar “Quryltaı alańy” dep atalǵan suhbat alańdarynda da halyqtyń keleshegimen bite qaınasatyn kúrdeli máseleler tóńiregindegi oılarymen bólisýge múmkindik aldy.
Láıla EDILQYZY.