Fılm S.Elýbaevtyń «Aq boz úı» romany boıynsha túsiriledi, dep habarlaıdy Egemen.kz Mańǵystaý oblysy ákimdigi taratqan aqparatqa silteme jasap.
Qazaqstannyń eńbek sińirgen qaıratkeri, jazýshy, kınodramatýrg Smaǵul Elýbaevtyń HH ǵasyrdyń 30-jyldaryndaǵy asharshylyq týraly áıgili «Aq boz úı» romany boıynsha Senek aýylynda drama janryndaǵy tarıhı fılm túsiriledi. Fılmde kúlli qazaq halqy kórgen náýbetti bir áýlet basynan keshirgen oqıǵa arqyly kórsetýdi maqsat etip otyr. «Úzdik sheteldik drama» nomınasııasyn alǵan «Ańshy bala» jáne «OAZIS», «Bala ǵashyq» kórkem fılmderin túsirýshi rejısser Begarys Elýbaevtyń bul fılminde basty róldi S.Seıfýllın atyndaǵy Qazaq drama teatrynyń ártisi Qaırat Kemalov Pahreddın bı retinde somdaıdy. «Parasat» ordeniniń ıegeri Smaǵul Elýbaev túsirilim tobymen birge Senek aýylyna kelip, fılm túsiretin orynmen tanysty. Qazaq eliniń asharshylyqtan qyrylǵan aýyr kezeńi somdalatyn tarıhı fılmniń túsirilimi aldaǵy apta bastalyp, 2022 jyldyń naýryz aıynda kórermenge jol tartpaq.