Memleket basshysy Qostanaı oblysynyń ákimi Arhımed Muhambetovti qabyldady, dep habarlaıdy Egemen.kz Aqordanyń baspasóz qyzmetine silteme jasap.
Prezıdent Qasym-Jomart Toqaevqa Qostanaı óńiriniń bıylǵy tórt aıdaǵy áleýmettik-ekonomıkalyq damý qorytyndylary men buǵan deıin berilgen tapsyrmalardyń oryndalýy jóninde esep berildi.
Arhımed Muhambetovtiń aıtýynsha, óńdeý ónerkásibi, negizgi kapıtalǵa ınvestısııa salý jáne turǵyn úılerdi paıdalanýǵa berý salalary boıynsha oń kórsetkishter bar. Qostanaıda quny shamamen 80 mıllıard teńge bolatyn jańa shoıyn quıý zaýytynyń qurylysy júrip jatyr. Atalǵan kásiporynda 300-ge jýyq jańa jumys orny ashylady.
Memleket basshysyna elimizdegi alǵashqy oqshaýlaý ortalyǵy qurylysynyń barysy men Kia jáne Renault avtomobılderin qurastyrýdyń jańa jelisiniń iske qosylǵany týraly baıandaldy. Jyl basynan beri óńirde 16 459 avtomobıl, onyń ishinde, 15 599 jeńil avtomobıl, 736 júk kóligi jáne 124 avtobýs shyǵaryldy. Jyl sońyna deıin 60 myń avtokólik qurastyrý josparlanǵan.
Qostanaı oblysy ákiminiń aıtýynsha, búginde 2,8 mıllıon gektar alqapqa dándi daqyl jáne 500 myń gektar jerge maıly daqyl egilgen. Egis naýqany 1 maýsymǵa qaraı aıaqtalady.
Sonymen qatar Prezıdentke Qostanaı oblysyndaǵy epıdemıologııalyq jaǵdaı týraly málimet berildi. Mekemeler talapqa saı medısınalyq jabdyqtarmen qamtamasyz etilgen. Dári-dármek pen jeke qorǵanys quraldarynyń qory da jetkilikti.
505 myń azamatqa vaksına egý josparlansa, búginge deıin 80 myńnan astam adamǵa ekpe salynǵan. Sondaı-aq «Ashyq» mobıldi qosymshasy belsendi engizilýde. Qazirgi tańda kásipkerlerden 270 ótinim qabyldanǵan.
Kezdesý qorytyndysy boıynsha Qasym-Jomart Toqaev óńirdegi eldi mekenderdi taza sýmen qamtamasyz etý, sondaı-aq, Arqalyq jylý elektr ortalyǵyn jańǵyrtý jumystaryn tezdetip aıaqtaý jóninde birqatar naqty tapsyrma berdi.