Álemdik kórinbeıtin óner mýzeıi jyl saıyn kórermenderge sýretshilerdiń tylsym kartınalaryn usynýymen áıgili. Olardyń mánin ońaılyqpen baǵamdaı almaısyz. Tek sheberdiń týyndyǵa berilgen arnaıy anyqtamasynan keıin ǵana tanýǵa bolady. Onyń ǵajaby da sonda. Sondaı bir erekshe sýretti Emı Devıdson esimdi oqyrman 10 myń dollarǵa satyp alady. Qyzyǵy, kenep betine aq tústen basqa boıaý jaǵylmaǵan.
The Museum on Non-Visible Art murajaıy keremetke toly. Nege deseńiz, onda oqyrmandy eleń etkizetin, oıyńdy san-saqqa júgirtetin qupııa dúnıe kóp. Ondaǵy týyndylardyń syryn túsiný qanshalyqty qıyn bolǵanymen, kórermenderdiń qatary sıregen emes. Qaıta jyl saıyn neshe túrli oqıǵa oryn alyp, uıymdastyrýshylardyń ózi qaıran qalyp jatady.
Máselen, sýretshi Djeıms Franko «Taza aýa» atty tússiz kartınasyna oqyrmandar osynshama qymbat baǵa usynady dep eshkim oılamaǵan. Tipti, avtordyń ózi de ań-tań. Onyń bar jumbaǵy konsepsııalyq ónerdi jańa beleske shyǵarýǵa tyrysqany. Jáne ony óte joǵary deńgeıde oryndap shyqqan.
Kartınamen qosa áıelge avtor jazǵan shyǵarmanyń sıpattamasy jáne shedevrdiń shynaıylyǵyna kepildik beretin broshıýralar tabystalǵan. Kórermender sheberdiń shyǵarmashylyǵy týraly oılanýdan alshaqtamas úshin, boıaýsyz keskindemeni basqa óner týyndylarynan bólek, ońasha qabyrǵaǵa ornalastyrǵan jón. Úıge kelgen qonaqtar aldymen osy kartınany tamashalaǵany durys, sebebi sýretshiniń pikirinshe atalǵan týyndy meımandardyń kóńil kúıin kóteredi.
Avtordyń taza aýa týraly sıpattamasynda: «Tek bir ǵana danasy bar erekshe týyndy. Siz satyp alǵan «móldir aýa» taýsylmaıtyn ottegi ballonyna uqsaıdy. Qaı jerde bolsańyz da, jer betinde paıda bolatyn eń dámdi, taza ıisti aýamen tynys alý múmkindigińiz bar. Ár tynys sizge sheksiz jan tynyshtyǵy men densaýlyq syılaıdy. Árdaıym bul shyǵarma sizge taý shyńdarynyń hám muhıttyń jupar ıisin syılaıdy», dep jazylǵan eken.
Tanymal «Huffington Post» basylymyna bergen suhba-
tynda sýrettiń endigi ıesi Eımı Devıdson kórinbeıtin jáne qol tıgize almaıtyn zattarǵa nege sonsha qumar ekenin bylaısha tarqatady.
«Jańa býyn ári buqaralyq aqparat quraldarynyń ókili retinde meni jobanyń ıdeologııasy shabyttandyrdy. Ásirese, kórinbeıtin óner murajaıynyń urany qatty unaıdy. Biz armandarymyz jáne ıdeıalarymyzben almasamyz. Bul bizdiń jańa ekonomıkadaǵy valıýtamyz», deıdi ol.
Emı Devıdsonnyń aıtýynsha, 2.0 tehnologııasynyń negizinde qurylǵan áleýmettik medıa resýrstar adamdardyń sanasynda tóńkeris jasaýmen este qalmaq. Qoǵamdaǵy vırtýaldy qarym-qatynastardyń saldarynan bizdiń ómirimiz bitpeıtin jarnamaǵa aınalýda. Shynaıy óner ózgerdi. Bári ońaı satylady jáne satyp alynady.