Keıingi ýaqytta kókpar oıyny qarqyndy damı bastaǵan Qaraǵandyda ulttyq sporttyń osy túrinen oblys chempıonaty ótti. Bul dodaǵa óńirdiń ár qıyrynan on komanda kelip, óner kórsetti. Mamandardyń sózine qaraǵanda, buryn qatysýshylardyń sany munsha kóp bolmaǵan eken.
Kókpardan oblystyq qurama komandanyń aǵa jattyqtyrýshysy Nurjan Shaıhın mundaı órleýdi óńir basshylyǵynyń, oblystyq deneshynyqtyrý jáne sport basqarmasynyń naqty qoldaý kórsetip otyrǵandyǵymen baılanystyrady.
– Osyndaı qamqorlyqtyń arqasynda jarysty joǵary deńgeıde ótkizý múmkindigine ıe boldyq. Endi aýdandarda jas kókparshylardy tárbıeleýmen qulshyna aınalysatyn, bizdiń óńirde osy ulttyq sport túrin belsendi túrde damytatyn yntaly jáne bilikti jattyqtyrýshylar jumys isteıtin bolady. Kókpardyń «jasaryp» kele jatqany anyq, bul bizdi qýantady, – deıdi N.Shaıhın.
Chempıonattyń fınaldyq oıyndar kezeńiniń qorytyndysynda Shet aýdanynyń kókparshylary aldyna jan salmaı, chempıon atandy. Kúmis júldeni Nura aýdanynyń komandasy ıelense, Jańaarqa jáne Qarqaraly aýdandarynyń balýandary qola júldeni ózara bólisti.
Qaraǵandy oblysynyń chempıonatynda kózge túsken úzdik kókparshylardan qurama komanda jasaqtaldy. Olar endi Pavlodar qalasynda ótetin el birinshiliginde óńirdiń namysyn qorǵaıtyn bolady.
Qaraǵandy oblysy,
Shet aýdany