Jaýyngerlik daıarlyqtyń deńgeıi, áskerı tártiptiń ahýaly, qarý-jaraq pen áskerı tehnıkany ustaý sapasy – osynyń bári óńirlik qolbasshylyqtar áskerleriniń jáne ásker tekteriniń qolbasshylarymen qorytyndy shyǵarý barysynda aıtyldy, dep habarlaıdy Egemen.kz.
Qurlyq áskerlerinde oqý kezeńindegi bes aıda shuǵyl jáne jaýyngerlik daıarlyq boıynsha 1000-nan astam shara ótkizildi. Onyń ishinde mańyzdylary: eki jaqty brıgadalyq taktıkalyq oqý-jattyǵýlar, basqarý organdarymen kóp satyly komandalyq-shtabtyq oqý-jattyǵýlar, «Altyn jebe-2021» arnaıy operasııalar kúshteriniń komponentterin tekserý boldy. Sonymen qatar jeke quram «Qalqan-2021» jedel-taktıkalyq oqý-jattyǵýyna qatysty.
– Qurlyq áskerleri áskerı qyzmetshileriniń kásibı sheberligi artqanyn baıqadyq. Jeke quram qysqy oqý kezeńiniń qorytyndysy boıynsha joǵary tártip pen áskerı boryshtyń úlgili oryndalýyn kórsete bildi, – dep atap ótti QR QK Qurlyq áskerleriniń Bas qolbasshysy general-maıor Talǵat Qoıbaqov.
Jarty jyldyń qorytyndysy boıynsha óńirlik qolbasshylyqtar men ásker tekteri arasynda «Ońtústik» óńirlik qolbasshylyǵy úzdik dep tanyldy. Áskerı bólimder arasynda – 38-shi desanttyq-shabýyldaý brıgadasy da bar.