Prezıdentke Shyǵys Qazaqstan oblysynyń jyl basynan bergi áleýmettik-ekonomıkalyq damýy jóninde esep berildi, dep habarlaıdy Egemen.kz.
Kezdesý barysynda óńirdiń ınfraqurylymdyq damý máselelerine erekshe nazar aýdaryldy. Osy rette, Qasym-Jomart Toqaevqa Buqtyrma sý qoımasy arqyly ótetin kópirdiń qurylysy boıynsha berilgen tapsyrmalarynyń oryndalýy, sondaı-aq Semeı qalasyndaǵy júk tasıtyn kólikterge arnalǵan kópirdiń qaıta jóndelý barysy baıandaldy. Odan bólek, Danıal Ahmetov Prezıdentke О́skemen jáne Úrjar qalalaryndaǵy áýejaılardy qaıta jóndeý jumystary týraly aqparat berdi. Áýejaılardy jańǵyrtý jumystary bıyl jyl sońyna deıin aıaqtalady.
Qasym-Jomart Toqaev halyqtyń áleýmettik az qamtylǵan tobyna arnalǵan turǵyn úıler men ınfraqurylymdardyń qurylysyn jyldamdatý qajet ekenin aıtty. Ákimniń aıtýynsha, 2020 jyly jaǵdaıy tómen jáne kópbalaly analarǵa 1049 páter men úı berilse, al osy jyldyń sońyna deıin olarǵa qosymsha taǵy 1125 baspana beriledi.
Kezdesýde kóterilgen taǵy bir másele – agrarlyq sektordyń eksporttyq áleýetin nyǵaıtý perspektıvalary. Danıal Ahmetov Memleket basshysyna jylyna 300 myń tonna ónim shyǵaratyn maıly daqyldardy qaıta óńdeý zaýytyn iske qosý jáne aýyl sharýashylyǵy ónimderiniń óndirisin odan ári keńeıtý josparyn tanystyrdy.
Odan bólek, óńirdiń ındýstrıaldy-ınnovasııalyq damý máseleleri sóz boldy. Danıal Ahmetov Aqtoǵaı taý-ken baıytý kombınaty qurylysynyń ekinshi kezeńi týraly málimet berdi.
Prezıdent kezdesý qorytyndysy boıynsha Shyǵys Qazaqstan oblysynyń ákimine birqatar tapsyrma berdi.