Osydan 40 jyldan da astam ýaqyt buryn keshegi – «Sosıalıstik Qazaqstan», búgingi – «Egemen Qazaqstan» basylymy fototilshiler arasynda baıqaýlar uıymdastyryp, eldi eleń etkizgen sýretter top jaryp júredi.
Al 1975 jyldary qazir respýblıkaǵa belgili fototilshi Bolat Omarálıev fotoetıýdtermen áýestenip, kóp ýaqytyn soǵan aldyryp júredi. Jarty ǵasyrlyq shejiresi bar sol baıqaýlarda baıyrǵy fototilshiniń «aty talaı báıgeden kelgen». Sol tamasha jumystardyń biri qalaı túsirildi?
«Ol kezde biz aýdandyq gazette isteımiz. Bir kúni bizdiń úıden túski as iship otyrǵanda men Bolatqa: «Sen fotoetıýd túsirgish bolsań saǵan bir-eki sıýjet beremin, sony túsirip alsań elden ozasyń», dedim ázildep.
Shaı iship bolǵan soń 4 jasar úlken ulym Shyńǵystyń qolyna dombyra ustatyp, dıvanǵa otyrǵyzdyq. Bolat fotoapparatyn daıyndap otyr. Ásheıinde dombyrany qolyna ustap óńkeıip otyratyn balam bul joly Bolattan uıaldy ma, qyrsyqty da qaldy. «Shyńǵys, óleń aıt, mynany aıt, anany aıt» dep óbektep, jalynyp jatyrmyn, bolmaıdy.
Daǵdarǵan kezimde munyń erkeligin ózine paıdalanaıyn dedim de, «Shyńǵys, Bolat ıt qoı», dep aıqaıla dedim. Qıqaıyp otyrǵan bala qulpyryp sala berdi. О́zi dıvanda, dombyra qolynda, kózi jumýly, álgi sózdi aıqaılap qoıa bersin. Men taǵy aıt dep, kótermeleımin, erke balaǵa bir ermek tabyldy. Al mundaı sıýjetti izdese de taba almaıtyn Bolat bala ıt demek túgeli shoshqa desede qaraıtyn emes, murny pysyldap, jan jaǵynan sýretti sartyldatyp túsirip jatyr.
Obaly ne kerek, Bolattyń ózi de sýrettiń piri ǵoı, ádemi fotoetıýd 4 jasar bala shyrqap otyrǵandaı shyqty. Keıin 1979 jyly «Sosalıstik Qazaqstan» gazeti «Bes jyldyq jáne biz» foto báıge jarııalady. Kún saıyn, jyl aıaǵyna deıin fotobáıgeniń sýretteri jarııalanyp turdy.
Baıqaýǵa myńdaǵan sýretpen júzdegen fototilshiler qatysty. Bolat bas báıge,1 oryndy «Án salaıyn áýeletip» degen osy sýretpen jeńip aldy.
«SQ» jigitteri biledi. Gazet shyǵyp ketkennen keıin onda jarııalanǵan sýretterdiń túpnusqasy kópke deıin saqtalady. Sodan «SQ» sekretarııatyna Asqar Súleımenov baryp qalmaı ma. Álgi sýret qyzyqty kompazısasymen Asekeńniń kózine ottaı basylyp, qolyna alyp:
– Jigitter myna sýret qaıdan? – dep suraıdy.
– Qyzylordadan. Bolat Omarálıev deıtin shtattan tys tilshimizdiń dúnıesi.
– Olaı bolsa osy bala ıa Iranbektiń, ıa Asqardyń balasynyń sýreti.Tipti basqa áıelinen tapsada, sol ekeýiniń balasy depti de, sýretti qaltasyna salyp alypty.
Bul sýret Asekeń akademııalyq teatrda ádebıet bólimniń meńgerýshisi bolǵan kezinde, biraz jyl jaqtaýǵa salyp, ilýli turdy», dep eske alady aqyn Asqar Kirebaev.
Sýretti túsirgen Bolat Omarálıev
ALMATY