Túrkistan oblysy Tólebı aýdanynda taýda joǵalǵan eki týrısti izdeýge ózbekstandyq qutqarýshylar da jumyldyryldy. Bul týraly óńirdiń TJD bastyǵynyń orynbasary Erik Sarybaev málimdedi, dep habarlaıdy Egemen.kz.
Vedomstvo basshysynyń aıtýynsha, kórshi eldiń qutqarýshylary izdeý sharalaryn kesheden bastap júrgizip jatyr.
«Izdeý sharalary bastalǵaly beri 350 shaqyrymnan asa aýmaq jaıaý aralandy. Sonymen qatar ushqyshsyz ushý apparattaryn paıdalaný arqyly 170 shaqyrymǵa jýyq aýmaq zertteldi. «QazAvıaqutqarý» AQ eki tikushaǵy arqyly 3400 shaqyrym aýmaqqa áýeden baqylaý júrgizildi. Qazirgi tańda izdeý jumysyna TJD, polısııa, UQK Shekara qyzmetiniń shekarashylary, ulttyq park qyzmetkerleri jumyldyrylǵan. О́zara is-qımyl josparyna sáıkes, kesheden bastap О́zbekstan Respýblıkasy, Tashkent oblysy, TJ bas basqarmasynyń qyzmetkerleri de óz aýmaqtarynda kirisip otyr. Izdestirý jumystary áli jalǵasatyn bolady», dedi Erik Sarybaev.
Eske salaıyq, Tólebı aýdanynyń Saıram-О́gem memlekettik ulttyq tabıǵı parkiniń aýmaǵynda 7 adamnyń joǵalǵany týraly habarlama 25 mamyrda túsken bolatyn.
Onyń úsheýi aman-esen tabylyp, úıine qaıtaryldy. Al, 29 mamyr kúni saǵat 00:30-da úzdiksiz izdestirý jumystarynyń barysynda О́gem ózeninen bir adamnyń jansyz denesi tabyldy.
Ol 1999 jyly týǵan taýda joǵalyp ketken týrıster tobynyń biri ekeni anyqtaldy. Ekinshi jigittiń denesi О́gem ózeninen 3 shaqyrym jerden tabylǵan.
Qalǵan eki adamdy izdestirý jumystary jalǵasýda. Jerdegi izdestirýdi qutqarýshylar, polısııa qyzmetkerleri, shekara qyzmetiniń at patrýli, ulttyq park qyzmetkerleri jáne joǵalǵandardyń týystary júrgizýde.