Prezıdent Konstıtýsııalyq Keńestiń tóraǵasy Qaırat Mámıdi qabyldady, dep habarlaıdy Egemen.kz Aqordanyń baspasóz qyzmetine silteme jasap.
Memleket basshysyna Konstıtýsııalyq Keńestiń aldaǵy Parlament palatalarynyń birlesken otyrysynda elimizdegi konstıtýsııalyq zańdylyqtardyń jaı-kúıi týraly jasaıtyn kezekti joldaýyna daıyndyq barysy baıandaldy.
Konstıtýsııalyq Keńes tóraǵasynyń aıtýynsha, atalǵan mańyzdy qujatta konstıtýsııalyq is júrgizý praktıkasy qorytyndylanady. Qazirgi zańnamada jáne ony qoldaný tájirıbesinde konstıtýsııalyq normalardyń iske asyrylýy, Konstıtýsııalyq Keńes sheshimderiniń oryndalýyna baǵa beriledi. Sonymen qatar azamattardyń konstıtýsııalyq quqyqtary men bostandyqtaryn saqtaý jáne qorǵaý máseleleri qaralady.
Qaırat Mámı bıylǵy joldaý Táýelsizdiktiń 30 jyldyǵyna arnalatynyn jáne Konstıtýsııalyq Keńes respýblıkadaǵy zań ústemdigin odan ári kúsheıtý jóninde naqty usynystar jasaıtynyn atap ótti.
Prezıdent Konstıtýsııanyń Qazaqstan memlekettiligi men el jetistiginiń negizi bolyp tabylatynyn aıtty. Osy oraıda, Konstıtýsııalyq Keńestiń qyzmeti Ata Zań erejelerin júzege asyrýda mańyzdy ról atqaratynyna toqtaldy. Memleket aýmaǵynda Konstıtýsııa ústemdigin qamtamasyz etý el damýynyń mindetti sharty ekenin atap ótti.