QR Premer-Mınıstri Asqar Mamın Exxon Mobil aǵa vıse-prezıdenti N. Chapmanmen Qazaqstanda ınvestısııalyq jobalardyń iske asyrylýyn talqylady, dep habarlaıdy Egemen.kz.
Taraptar kómirsýtegi shıkizatyn barlaý, óndirý jáne tasymaldaý salalaryndaǵy birlesken ınvestısııalyq jobalardy jáne «Kaspıı Qubyr Konsorsıýmy» munaı qubyryn jańǵyrtý máselelerin talqylady.
Qashaǵan ken ornyn odan ári ıgerý keleshegine erekshe nazar aýdaryldy. 2020 jyly munda 15,1 mln tonna munaı óndirildi, bul 2019 jylǵy kórsetkishten 7,1%-ǵa artyq. 2021 jyly 15,15 mln tonna munaı óndirý josparlanǵan.
Munaı-gaz hımııasy salasyndaǵy — polıetılen jáne joǵary qaıta óńdelgen basqa da ónimder óndirý salasyndaǵy birlesken jobalardy damytý perspektıvalary talqylandy. Úkimet basshysy Qazaqstanda munaı-gaz hımııasy óndiristeriniń jobalaryn iske asyrý kezinde Exxon Mobil tájirıbesin zerdeleý úshin jumys tobyn qurýdy tapsyrdy.
A. Mamın QR aýmaǵynda «Exxon Mobil» biregeı jabdyǵynyń óndirisin jergiliktendirýdiń, kompanııanyń satyp alýlaryndaǵy qazaqstandyq qamtý úlesin arttyrýdyń, zamanaýı ekologııalyq taza tehnologııalardy qoldanýdyń, densaýlyq saqtaý jáne eńbek qaýipsizdigi salasynda joǵary standarttardy saqtaýdyń, sondaı-aq Qazaqstanda áleýmettik jobalardy iske asyrýdyń mańyzdylyǵyn atap ótti.
Exxon Mobil – QR iri ınvestorlarynyń biri. 1993 jyldan bastap kompanııa Qazaqstan ekonomıkasyna $26 mlrd astam ınvestısııa saldy.
Kezdesýge energetıka mınıstri Nurlan Noǵaev pen «QazMunaıGaz» UK» AQ basqarma tóraǵasy Alık Aıdarbaev qatysty.