Qýańshylyqtyń qıyndyǵyn tartyp otyrǵan Aral aýdanyndaǵy sharýashylyqtarǵa jem-shóp jetkizile bastady. Kúni keshe aýdanǵa 116 tonna jońyshqa shóbi aparylsa, aldaǵy kúnderi 518 tonna mal azyǵy jetkiziledi. Qazir Aqtóbe oblysynyń Yrǵyz aýdany jáne aımaqtaǵy aýdandarmen kelisimder jasalýda, dep habarlaıdy Egemen.kz.
«Qys-kóktem mezgilderinde qar men jaýyn-shashyn mólsheriniń az bolýyna baılanysty Aral aýdanynda qýańshylyq jaǵdaıy oryn aldy. Mal sany men mal azyǵynyń balansyn ustap turý úshin aýdandaǵy sharýashylyq qurylymdary mal bastaryn qysqartý baǵytynda jumys jasap jatyr. Aýyl turǵyndary, eriktiler jáne aýdandyq tótenshe jaǵdaılar bóliminiń qyzmetkerleri tarapynan kezekshilik uıymdastyrylýda. Qazir mal ólimi joq», dedi Aral aýdany ákiminiń orynbasar Erkin Ábishev.
Aımaq basshysynyń tapsyrmasyna saı araldyq sharýalardyń mal azyǵy máselesin sheshýdiń júıeli jospary jasalyndy. Máselen, ár aptanyń senbi kúni Aral aýdanynda aýyl sharýashylyǵy jármeńkesi ótkizilip, jem shóp naryq baǵasynan 10-15 paıyzǵa arzan baǵada satylady.
«Oblys sharýalaryn mal azyǵymen qamtý maqsatynda júıeli jumystar atqarylýda. Mal sharýashylyǵy boıynsha taýaróndirýshilerdi memlekettik qoldaý maqsatynda ótken jyldan bastap «Aýyl sharýashylyǵy maldarynyń azyǵyna jumsalǵan shyǵyndar qunyn arzandatý» baǵytynda sýbsıdııalaý bastaldy. Nátıjesinde oblystyq bıýdjetten 730,0 mln teńge bólinip, 588 sharýashylyq memlekettik qarjyny ıemdendi. Onyń 42-si araldyq sharýalar», dedi oblystyq aýyl sharýashylyǵy basqaramasy basshysynyń mindetin atqarýshy Aınur Tileýleeva.
Qazir veterınarııa mamandary men arnaıy zerthanashylar aýdandaǵy eldi mekenderdi aralap, tekserý jumystaryn júrgizýde. О́lgen maldardan synamalar alýda.
«Aýdanda 8 aýylda maldardyń ólý faktisi tirkelgen. Zerdeleý júrigizilip, synama alynýda. Hattama toltyryp, barlyǵyn tirkeýdemiz. Zerthana mamandary 6 bas jylqydan gastrofılez aýrýyna, 6 bas múıizdi iri qaradan parenhımatozdy aýrýyna taldamalar aldy», dedi oblystyq veterınarııa basqarmasy basshysynyń orynbasary Ánýarbek Dármaǵambetov.
Maldardan bólek aýdan mańyndaǵy darııa men sýattardan da synama alynǵan. Saraptama qorytyndysyna sákes tórt túliktiń ólý faktisi neden oryn alǵandyǵy anyqtalyp, tıisti sharalar qabyldanatyn bolady.