Shaıbaly hokkeıden Latvııada ótip jatqan álem chempıonatynyń jartylaı fınalyna joldama alǵan komandalar anyqtaldy, dep habarlaıdy Egemen.kz.
Shırek fınaldyq saıysta AQSh quramasy Slovakııanyń tas-talqanyn shyǵardy. Esep – 6:1. Bul matchta Kolın Blekvell men Konor Garland dýbl avtory atansa, Braıan Boıl men Aleksandr Hmelevskı bir-bir goldan soqty. Slovakııalyqtar qatarynan Peter Seglarık qana shaıbany torda týlata aldy.
Fınlıandııa men Chehııa arasyndaǵy básekeniń taǵdyryn ekinshi kezeńde Sýomı eliniń surmergeni Iere Innala soqqan jalǵyz gol sheshti – 1:0.
Germanııa men Shveısarııa arasyndaǵy kezdesýde jeńimpaz komanda býllıt soǵý barysynda anyqtaldy. Bul rette nemisterdiń baǵy jandy – 3:2. Kanadanyń hokkeıshileri Reseı quramasyn overtaımda utty – 2:1.
Jartylaı fınaldyq básekeler 5 maýsymda ótedi. Bul kezdesýlerde AQSh pen Kanada jáne Fınlıandııa men Germanııa kúsh synasady.