Memlekettik rámizder kúnine oraı О́skemende Mádenıet qaıratkeri, Qazaqstan Jazýshylar odaǵynyń múshesi, Tarbaǵataı aýdanynyń Qurmetti azamaty, aqyn Almas Ahmetbekulymen shyǵarmashylyq kezdesý keshi ótti, dep habarlaıdy Egemen.kz.
Memlekettik rámizder kúnindegi is-shara «Kók týdyń jelbiregeni» ániniń sózin jazǵan aqyn Almas Ahmetbekuly men jastar arasyn baılanystyra otyryp, patrıottyq sezimdi, rámizderge degen qurmetti arttyrýdy maqsat etti.
– Alǵash kók týdy Qorǵas shekara beketinen elge ótip kele jatqanda kórdim, baıraq alysta jelbirep turdy. «Kók týdyń jelbiregeni» – saǵynyshqa toly, jan tebirenter, rýhty oıatar án dep oılaımyn. Atamekenge degen saǵynyshtan, kók baıraǵymyzdy kórgendegi tebirenisten týǵan án. Otanyna jete almaı júrgen qazaqtardyń júrek lúpili, – dedi Almas Ahmetbekuly.
Aqyn ómir joly, balalyq shaǵy týraly qyzyqty áńgime órbitti. Almas AhmetbekulyQytaıdyń Tarbaǵataı okrýginde dúnıege kelgen. 1982 jyly Ile pedagogıkalyq ınstıtýtynyń fılologııa fakýltetin bitirgen. Ádebıetke alty jasynan qumartqanyn, on jyldaı Qytaıdyń Sháýeshek qalasynda shyǵatyn «Tarbaǵataı» ádebı jýrnalynda qyzmet etip, 1993 jyly elge oralǵanyn aıtty.
Bıyl alpysqa kelgen Almas Ahmetbekulyna shyǵys qazaqstandyqtar qurmet-iltıpatyn kórsetip, ıyǵyna shapan jaýyp jatty. Júrekjardy lebizderin aqtardy.
– «Kók týdyń jelbiregeni» áni el Táýelsizdiginiń sımvolyna aınalyp, jastardy shabyttandyryp keledi. Ár aqynnyń Otan aldyndaǵy óz boryshy bar, Almas Ahmetbekuly osy paryzyn tolyq ótedi dep oılaımyn, – dedi ShQÝ rektory, professor Muhtar Tólegen.
Amanjolov ýnıversıtetiniń jastary osy is-shara aıasynda tutas konserttik baǵdarlama usyndy. «Shabyt» stýdenttik teatrynyń akterleri aqynnyń óleńderin jatqa oqyp, ýnıversıtet túlegi Aıan Qalymbek mereıtoı ıesine arnaý aıtty. Patrıottyq ánder shyrqaldy. Kezdesý «Kók týdyń jelbiregeni» ánimen aıaqtaldy.