Elordadaǵy Táýelsizdik saraıynda balalar men jastarǵa arnalǵan damytý ortalyǵy saltanatty túrde ashyldy, dep habarlaıdy Egemen.kz.
«Búgin Táýelsizlik saraıyn damytýdyń jańa tujyrymdamasyn tanystyrýdamyz. Pandemııa kezinde kóptegen kásiporyndar men mádenıet nysandary óziniń tıimsiz ekendigin kórsetti.
Táýelsizdik saraıynyń burynǵy tujyrymdamasy aýqymdy halyqaralyq jáne kópshilikke arnalǵan mádenı is-sharalardan turdy. Degenmen karantın talaptaryna baılanysty atalǵan tujyrymda óz mańyzdylyǵyn joǵaltty. Osy oraıda bıýdjet qarjysynan kúneltip otyrǵan aýmaǵy 38 myń sharshy metr bolatyn bul nysannyń qyzmetin qaıta qaraý kerek boldy. Búgin kommýnaldyq menshikti qalaı tıimdi basqarý kerektigin kórsetetin bolamyz.
Biz bıýdjet shyǵynyn azaıtyp, nysannyń kommersııalyq múmkindigin arttyrdyq. Sonymen qatar Táýelsizdik saraıynyń áleýmettik-mádenı mańyzdylyǵyn da esten shyǵarmaımyz», dedi Astana Venue Management JShS-nyń bas dırektory Málik Hasenov.
Táýelsizdik saraıynyń jańa tujyrymdamasyna sáıkes balalar men jastardyń shyǵarmashylyq jáne sport áleýetin arttyrý maqsatynda munda úıirmeler men túrli seksııalar ashyldy. Úıirmelerge kúndelikti 2 myńǵa jýyq bala qatysady.