ShQO-da túrmedegi kúıeýine uzaq merzimge kezdesýge kelgen áıeli uıaly telefondy sálemdemege jasyryp, kirgizbek bolǵan kezde ustaldy, dep habarlaıdy Egemen.kz.
Uzaq merzimdi kezdesýge kelgen áıeldi tekserý barysynda túrmege ákelgen sálemdemesiniń arasynan eki dana uıaly telefon men oǵan qosymsha qýattaǵysh qural, qulaqqap jáne SIM-karta tabylyp, tárkilengen.
Sottalǵannyń áıeli telefondy jeke zattarynyń arasyna jasyryp, qyzmetkerlerge ózimen birge tyıym salǵan zattardyń joq ekenin aıtqan. Alaıda mekeme qyzmetkerleri tekserý kezinde mekeme aýmaǵyna kirgizýge tyıym salynǵan zattardy alyp ótýdiń taǵy bir dereginiń aldyn aldy.
Qyzmetkerlerdi aldap, quqyq buzýshylyqqa jol bergeni úshin sottalǵannyń áıeli ákimshilik jaýapkershilikke tartylatyn bolady jáne oǵan zańnamaǵa sáıkes 10 aılyq eseptik kórsetkish mólsherinde aıyppul salynýy múmkin.
Atalǵan derek ShQO boıynsha QAJ departamenti mekemesiniń esep jáne aqparat kitabynda tirkelip, QR QK 481-babynyń 1-bóligine sáıkes prosessýaldyq sheshim qabyldaý úshin qujattar jınalýda.
«Erekshe tártiptegi kolonııalarda aýyr jáne asa aýyr qylmystar úshin sottalǵandar jáne buryn birneshe ret sotty bolǵan qylmyskerler jazasyn ótep jatyr. Mekeme tarapynan jasalatyn eskertýlerge qaramastan, sottalǵandardyń qamqor týystary men tanystary mekeme aýmaǵyna tyıym salynǵan zattardy alyp ótýge tyrysýda. Bizdiń qyzmetkerler osyndaı tyıym salynǵan zattardyń mekeme aýmaǵyna ótpeýi úshin qyraǵylyq tanytyp, óz qyzmetterin muqııat atqaryp, quqyq buzýshylyqtyń aldyn alýda», deıdi mekeme bastyǵynyń orynbasary Bolat Maızaqov.