Soltústik Qazaqstan oblysynyń ortalyǵyna jaqyn ornalasqan Beskól aýylynyń 70 jasar turǵyny Sergeı Kosenko týystaryna qaıda baratynyn eskertpeı, kún qulan ıektene bastaǵanda balyq aýlaý úshin kóligimen kólge ketip qalǵan, dep habarlaıdy Egemen.kz.
Onyń qaı kólge ketkenin eshkim bilmeı qalǵan. Tek keshke jaqyn zeınetker týystaryna telefon arqyly habarlasyp, qaıyqpen kóldiń ortasyna ketip qalyp, baǵytynan adasyp ketkenin aıtqan. Ol nemeresine tek sý qoımasynyń Aqqaıyń aýdany Daıyndyq aýylyna jaqyn ekenin aıtyp úlgergen, osydan keıin telefonynyń qýaty taýsylyp, baılanys úzilip qalǵan. Onyń ústine bastalǵan jańbyr men qatty jel týystaryn qatty ábigerge salǵan. Izdeýge shyqqan balyqshynyń nemereleri 112 arnasyna habarlasyp, kómek suraıdy.
Kómekke Aqqaıyń aýdanynyń ýchaskelik polısııa ınspektory men TJD qyzmetkerleri jetip, adasyp ketken balyqshyny izdeýge kirisedi.
«Qas qaraıyp, jańbyr jaýyp tursa da, eshkimde de izdeýdi toqtatý týraly oı bolmady. Arnaýly qyzmet ókilderi bizdi qoldap, senimdilik uıalatyp, sabyrǵa shaqyrdy», deıdi qarttyń jaqyny, Beskól kentiniń turǵyny Natalıa Salmına.
Ýchaskelik polısııa ınspektory Ádı Muǵjanov pen izdeýge qatysqan ózge adamdar «Nıva» avtokóligimen kól jaǵasyn súzip júrip, balyqshynyń kóligin tabapqan. Izdeýshiler osy jerden jaryqtaryn jaǵyp, belgi beredi. 5 saǵat boıy jaǵaǵa shyǵa almaı adasqan zeınetker qamys arasynan kóringen fardyń jaryǵyn baıqap, jaǵalaýǵa qaraı bet alady. Qatty jel qaıyqty alǵan baǵytynan aýytqyta berse de eskekti qalaı esýdi jaqsy meńgergen qart jolynan taımaı, jaryqtyń tusyna aman jetedi. Bul jerde ony jaqyn adamdary qarsy alady. Sóıtip aqsaqal qatty tońyp, ábden ashyqsa da bir ajaldan qalyp, óziniń týystaryna aman qosyldy. Qarttyń barlyq týystary ózderine qol ushyn berip, jaqyn jandaryn ajaldan alyp qalýǵa kómektesken polısııa men TJD qyzmetkerlerine alǵystaryn jaýdyrdy.
Soltústik Qazaqstan oblysy