Elimizdiń batysynda «Bekire-2021» balyq qorǵaý aksııasy aıaqtaldy. Eki aıda brakonerlerden 35 tonna balyq tárkilendi, dep habarlaıdy Egemen.kz.
Balyq sharýashylyǵy komıteti baspasóz qyzmetiniń aqparatyna qaraǵanda, balyq qorǵaý aksııasy 1 sáýir - 31 mamyrda Atyraý, Mańǵystaý jáne Batys Qazaqstan oblystary aýmaǵyndaǵy Jaıyq-Kaspıı basseıniniń sý aıdyndarynda ótti. Aksııa kezinde balyq qorǵaý zańnamasyn buzýdyń 1262 deregin anyqtaldy. Onyń ishinde Atyraýda – 952, Mańǵystaýda – 137, Batys Qazaqstan oblysynda 173 quqyq buzýshylyq tirkelip otyr.
«Osy kezeńde 862 quqyq buzýshy ákimshilik jaýapkershilikke tartyldy. Onyń 114-ine sot tártibimen 56 qylmystyq is qozǵaldy. Tártip buzýshylarǵa 15,4 mln teńge aıyppul salyndy. Zańsyz aınalymnan 35 tonnadan astam balyq tárkilendi. Onyń 4,6 tonnasy – bekire tuqymdas balyq túrleri. Sondaı-aq, 908 aýlaý, 95 júzý, 23 kólik quraly alyndy. Jaıyq-Kaspıı basseıniniń sý qoımalarynan sıntetıkalyq monojipten daıyndalyp, zańsyz ornatylǵan 3035 aýlaý quraly tabyldy», dep málim etti Balyq sharýashylyǵy komıtetiniń baspasóz qyzmetinen.
Balyq qorǵaý aksııasy kezinde bekire tuqymdas balyqtardy zańsyz tasymaldaǵan, saqtaǵan derekter de bar.
«Máselen, 15 sáýirde Atyraý oblysyndaǵy Janbaı aýylynyń mańynda jalpy salmaǵy 100 keli bekire tuqymdas balyq tasymaldaǵan avtokólik ustaldy. Sol kúni Atyraý qalasynda jergilikti turǵynnan 812 keli 247 dana bekire tuqymdas balyq tárkilendi. Al, 17 sáýirde «Aqjaıyq» memlekettik tabıǵı rezervatynyń aýmaǵyndaǵy tyıym salynǵan jerde kásipshilik balyq aýlaýdy júzege asyrǵan 2 adam anyqtaldy. Shaǵyn kólemdi kemeni tekserý kezinde 2,2 tonna balyq tabylyp, tárkilendi. Ustalǵan adamdarǵa tıesili sýdan aýlaý quraly (venter) alyndy. Mańǵystaý oblysynyń Fort-Shevchenko qalasynda 26 sáýirde 148,55 keli bekire tuqymdas balyqty zańsyz tasymaldaǵan jergilikti turǵynnyń basqarýyndaǵy avtokólik toqtatyldy» dep habarlady komıtettiń baspasóz qyzmeti.
Al, Batys Qazaqstan oblysynda ruqsat qujattynsyz balyq tasymaldaǵan 16 avtokólik júrgizýshisi ustalypty. Osyndaı is-sharalardyń nátıjesinde 15 tonnaǵa jýyq balyq tárkilenip, 15 qylmystyq is qozǵalyp otyr.
Aksııa kezinde bazarlar men mamandandyrylǵan dúkenderde sıntetıkalyq monojipten jasalǵan balyq aýlaý quraldarynyń zańsyz satylýyna monıtorıng júrgizildi. Onyń nátıjesinde 29 sáýirde Atyraý qalasyndaǵy bazarlardyń birinde tyıym salynǵan 79 aýlaý quralyn satý deregi anyqtalyp, tártip buzýshyǵa QR Ákimshilk quqyqbuzýshylyq týraly Kodeksiniń 196-babymen 72,9 myń teńge aıyppul salyndy.