Ulttyq halyq sanaǵyn ótkizý kezindegi basty máselelerdiń biri – azamattardyń jeke qaýipsizdigi. Sanaq kezinde ıntervıýerlerdiń el azamattarynyń jeke málimetterimen tikeleı jumys isteýine týra keledi. Kópshilik tarapynan osyǵan baılanysty «málimetter úshinshi tulǵalardan qanshalyqty qorǵalǵan?» degen suraq týyndaýy zańdy.
Azamattardan sanaq kezinde alynǵan barlyq aqparat Ulttyq statıstıka bıýrosynyń ortalyq serverine jiberiledi.
Ulttyq statıstıka bıýrosynyń aqparattyq júıesi aqparattyq-kommýnıkasııalyq ınfraqurylymdardyń asa mańyzdy nysandarynyń tizimine engizilgen jáne UQK «Memlekettik tehnıkalyq qyzmet» AQ-nyń taldaýyna alynǵan. Toqsan saıyn júıeniń osal tustaryn anyqtaý maqsatynda tekserý júrgizilip otyrady. Sondaı-aq sanaq qarsańynda aqparattyq júıeniń qaýipsizdik talaptaryna sáıkestigi synaqtan ótkizilip, bul boıynsha oń nátıje alynǵan bola- tyn.
Arnaıy sanag.gov.kz saıtynyń qorǵanyshy retinde server men qoldanýshy arasyndaǵy aqparat almasý https hattamasymen qorǵalǵan, álemdegi iri sertıfıkattaý ortalyqtarynyń biri Sectigo SSL-sertıfıkaty alyndy.
Halyq sanaǵy kezinde málimetterdi ortalyq serverge berý eki tásilmen júzege asyrylady. Birinshisi – planshetten onlaın rejimde qorǵalǵan jeli arqyly (ınternetke qosylmaı) uıaly baılanys operatorynyń málimetterdi pakettik berýi. Mundaı baılanys túrin ıntervıýer barlyq deńgeıde (qalalyq, aýdandyq, aýyldyq) operator qyzmetiniń baılanys aımaǵynda planshetti qoldanyp júrgize alady.
Ekinshi tásil – uıaly baılanysy nashar shalǵaı aýyldarda saýaldama júrgizý kezinde paıdalanylady. Intervıýer úshin derekterdi qorǵanys kanaly arqyly ortalyq sanaq serverine oflaın rejimde tikeleı Ulttyq statıstıka bıýrosynyń biryńǵaı sanaq bazasyna jiberý múmkindigi kózdelgen.
Jiberiletin barlyq faıl shıfrlanǵan. «Alǵashqy statıstıkalyq derekterdiń saqtalýy men qupııalylyǵyn qamtamasyz etý Qazaqstan Respýblıkasynyń zańnamasymen retteletin prosester sheńberinde qazirgi zamanǵy tehnıkalyq quraldardy paıdalaný arqyly jáne aqparattyq qaýipsizdik salasyndaǵy ýákiletti organmen birge júzege asyrylady. Budan basqa, «Memlekettik statıstıka týraly» Qazaqstan Respýblıkasy Zańynyń 8-baby 1-tarmaǵyna sáıkes alǵashqy statıstıkalyq derekter qupııa bolyp tabylady jáne ony memlekettik statıstıka organdary tek statıstıkalyq aqparatty alý, jınaý maqsatynda ǵana paıdalanady. Memlekettik statıstıka organdary alǵashqy statıstıkalyq derekterdi jınaý, óńdeý jáne saqtaý kezinde olardyń qupııalylyǵyn qamtamasyz etedi», dedi Ulttyq statıstıka bıýrosy.
2021 jyldyń Ulttyq sanaǵynyń negizgi kezeńi 1 qyrkúıek pen 30 qazan aralyǵynda júrgiziledi. Oǵan onlaın rejiminde de, dástúrli ádispen de qatysýǵa bolady. 2021 jyldyń sanaǵynyń urany – «Qazaqstanda árkim mańyzdy! V Kazahstane kajdyı vajen!».