Áleýmettik jelilerde Túrkistan oblysynda mektep dırektory 9 synyp oqýshysyn sýısıd jasaýǵa ıtermeledi degen aqparat tarady, dep habarlaıdy Egemen.kz Stan.kz aqparat agenttigine silteme jasap.
Ordabasy aýdanynyń týmasy Nurdáýlet Myqtybekov qaryndasynyń ólimine mektep dırektorynyń tikeleı qatysy baryn aıtyp, ádildik surady.
«Qurmetti Túrkistan oblysynyń ákimi О́mirzaq Shókeev, qurmetti bas prokýror Ǵızat Nurdaýletov, ishki ister mınıstri Erlan Turǵynbaev, bilim mınıstri Ashat Aımaǵambetov, balalar quqyǵyn qorǵaýshy Arýjan Saın.
2021 jyly 2 maýsym kúni, bir apta buryn 9 synypty bitirgen qaryndasym Myqtybek Elvıra óz-ózine qol jumsady. Qaryndasymdy ózine qol jumsaýǵa ıtermelegen jáne onyń ólimine kináli birden-bir adam – mektep dırektory Staeva Aısara Nýrjıgıtovna dep esepteımin. Elvıra úzdik attestattan úmitti mekteptegi úsh oqýshynyń biri boldy. Alaıda dırektor úzdik bitirýge barynsha kedergi keltirip, emtıhanda qysym kórsetken», deıdi Nurdáýlet Myqtybekov.
Onyń sózinshe, mektep dırektory qaryndasyn emtıhannan keıin kidirtip, qysym kórsetken. Baǵasyn kemitemin dep qorqytqan kórinedi.
«Emtıhanda tóbesinen tónip turyp baqylaǵan. «Sen úshke oqıtyn oqýshysyń, seniń baǵańdy 10 ball kemitemin» dep oqýshylardyń kózinshe aıtqan. Emtıhannyń sońynda jeke alyp qalǵan. Ne aıtyp, ne qysym jasaǵany belgisiz. Syrtqa shyqqanda qaryndasym qatty yzalanyp, jylap shyqqan. Buǵan úı ishi, muǵalimder men synyptastary da kýá. Qalǵan úzdik attestatqa úmitker oqýshylarǵa qysym kórsetpegen. Olardan aqsha alýy da múmkin. Aýyl arasynda ondaı áńgime de bar. Osyndaı qysymnan keıin buǵan deıin beske oqyǵan qaryndasym bir sabaqtan tórt degen baǵa alyp, qatty kúızelisten úı aýlasynda arqanǵa asylyp, kóz jumdy», deıdi ol.
Oqıǵaǵa baılanysty Túrkistan oblystyq polısııa departamentiniń basshysy túsinikteme berdi.
«Atalǵan jaıt boıynsha Túrkistan oblysy polısııa departamentiniń bilikti tergeýshilerimen QR QK-niń 105-baby «О́zin-ózi óltirýge deıin jetkizý» boıynsha sotqa deıingi tergeý jumystary júrgizilýde jáne qajetti degen barlyq jan-jaqty sharalar júzege asyrylýda. Onyń ishinde mektep ujymynan, muǵalimder men oqýshylar arasynda jaýap alynýda. Tıisti saraptamalar da taǵaıyndaldy. Istiń zań aıasynda júrgizilýin qadaǵalap otyrmyz», deıdi Túrkistan oblysy polısııa departamentiniń basshysy Q.Dalbekov.
Ázirge dırektorǵa taǵylǵan aıyp qanshalyqty ras nemese negizsiz ekenin aıtý qıyn. Oqıǵanyń mán-jaıy anyqtalǵan soń qosymsha aqparat beriletin bolady.