Býdapeshte ótip jatqan dzıýdoshylardyń álem chempıonatynyń úshinshi jarys kúni de asa shıelenisti aıqastarǵa toly boldy. Búgin erler 73 kılo jáne áıelder 57 kılo salmaq dárejeleri boıynsha júldelerdi sarapqa saldy, dep habarlaıdy Egemen.kz
Erlerdiń fınaldyq saıysynda London Olımpıadasynyń jeńimpazy, Rıo Olımpıadasynyń qola júldegeri, álem jáne Eýropa chempıony, grýzııalyq Lasha Shavdatýashvılı men Eýropa oıyndarynyń jeńimpazy, qurlyq birinshiliginiń úsh dúrkin jeńimpazy, shvesııalyq Tommı Masıas kúsh synasty. О́te tartysty ótken básekeniń taǵdyry shıdomen sheshildi. Qosymsha ýaqytta Masıas úshinshi eskertýin aldy. Sóıtip, Qap taýynyń qyrany altyn tuǵyrǵa kóterildi. Qola medal japonııalyq Soıshı Hasımoto men túrkııalyq Bilál Chıloǵylyǵa buıyrdy.
Áıelder arasyndaǵy jarystyń bas júldesin japonııalyq Momo Tamaokı men kanadalyq Djessıka Klımkaıt sarapqa saldy. Bul tartys Úıeńki japyraqtar eli ókiliniń paıdasyna sheshildi. Kosovolyq Nora Gıakova men germanııalyq Tereza Shtol qola medaldardy moıyndaryna ildi.
Esterińizge sala keteıik, búgin Qazaq eli namysyn Jansaı Smaǵulov pen Ańsarbek Ǵaınýllın jáne Sevara Nyshanbaeva qorǵady. Alaıda olardyń barlyǵy da ekinshi aınalymnan asa almady.