Bastaýyshtyń baǵbany

О́mir esigin ashqannan, aq halatty abzal jandardyń jasaǵan kómekteri oń nátıje bere qoımaǵan Roza múm­kindigi shekteýli balalardyń biri boldy. Bul qıyndyqqa moıymady, qaıta qatarynan qalmaýǵa, aldy bolýǵa tyrysyp, bıikke umtyldy. «О́mirdiń árbir tabaldyryǵy jańa orta: mektep, joǵarǵy oqý orny, qyzmet orny. Árbir jańa orta – men úshin úlken kúres. Men eshkimniń aıap, músirkep qaraǵanyn unatpadym. Kóp izdenip, óz eńbegimmen jeke tulǵa ekenimdi dáleldegim keldi. Osy talpynys meni básekege qabiletti, suranysqa ıe ustaz bolýǵa jetelep otyrdy. О́mirimde úlken qýa­nyshym Erkejan esimdi qyzym bar. Alla buıyrsa, bıyl joǵary oqý ornyn aıaqtap, aǵylshyn tili pániniń muǵalimi bolady. Qazirgi mektep – mádenıettiń, bilim men tárbıeniń oshaǵy, oqýshynyń jeke tulǵa bolyp fýnksıonaldy saýatty qalyptasýyna, onyń sana-sezimin jańa deńgeıge jetkizýine múmkindik jasaıtyn úzdiksiz bilim beretin keshendi orta. Osy ortanyń durys jolyn salyp beretin ustaz. Ustaz! Bul qasıetti sózdi estigende ózime qandaı jaýapkershilik júktelgenin shyn júrekpen sezinemin. О́ıtkeni aldymda otyrǵan árbir bala úshin men jaýaptymyn. Al shákirt úshin ustazdan asqan aqyldy, bilimdi adam bolmaıdy. Kez kelgen adam muǵalim mamandyǵyn alyp shyǵýy múmkin, biraq naǵyz ustaz bolý úshin úlken eńbek pen tózimdilik qajet», deıdi ulaǵatty ustaz.

Iá, 1992 jyldan beri, ıaǵnı bas­taýysh synyp muǵalimi bolyp jumys istep júrgenine 30 jylǵa aıaq basqan Roza Kerimbekova qanshama balany birinshi synypqa qabyldap, bilim nárimen sýsyndatty. Árbir bala qaıtalanbas bir ǵajaıyp álem desek, sol zerttelmegen taza qupııaǵa tereń úńilip, basqaǵa uqsamaıtyn erekshe qasıetterin taný, onyń júregine, jan dúnıesine jol taba bilý – ustazdyń mindeti. «Ásirese, mektep tabaldyryǵyn endi attaǵan balalar taza aq paraq sekildi. Oǵan ne jazsań, sony oqısyń. «Ne ekseń, sony orasyń» deıdi halyq danalyǵy. Bizdiń eńbegimiz aldymyzda otyrǵan oqýshylarymyzdyń bilimdiligi men tárbıeliligi arqyly baıqalady. Kúndelikti mektepke qýanyshpen, shat kúlkimen kelgen baqytty búldirshinderdiń júzin, olardyń bilýge, jaýap berýge talpynystaryn kórý, asyǵyp jarysa qol kóterýine kýá bolý – men úshin úlken ǵanıbet. Bala ustazdyń boıyndaǵy súıispenshilik pen shynaıylyqty tez sezedi. О́ziniń senimdi aqylshysynyń aıtqanyn buljytpaı oryndaıdy. Tipti seniń aıtqandaryńdy qaıtalap, saǵan uqsaǵysy keledi. Múmkin ustaz baqyty degen osy bolar», deıdi Roza Arshabaıqyzy. Shákirtterine ǵylym negizderinen málimet berip qana qoımaı, ony dúnıejúzilik bilim, aqparat, ekonomıka keńistigine shyǵatyn, ıaǵnı básekege qabiletti jeke tulǵany qalyptastyrý qajet dep sanaıtyn Roza Kerimbekova shyǵarmashylyqpen jumys isteıtin jańa formasııanyń jańashyl ustazy. Shymkent qalasyndaǵy M.H.Dýlatı atyndaǵy №8 maman­dandyrylǵan gımnazııa – qaladaǵy daryndy balalardy úsh tilde oqytatyn birden-bir zamanaýı bilim mekemesi. Keıipkerimiz osy gı­mnazııa­da qanshama balanyń saýa­­tyn ashty, 2004-2010 jyldar aralyǵynda «Bastaýysh synyp ádistemelik birlestiginiń» jetekshisi boldy. Qazir osy birlestiktiń mentory. Áriptesterine qolynan kelgenshe ádistemelik kómegin berip, úıretýden jalyqqan emes. О́zi de árdaıym izdenis ústinde, shyǵarmashylyǵyn damytyp otyrady. Izdenimpaz muǵalim respýblıkalyq ǵylymı jobalar konkýrsynyń jeńimpazdaryn, oqýshylardy ǵylymı zertteý jumys­taryna, pándik olımpıada­larǵa daıyndaǵany úshin Alǵys hattarmen, dıplomdarmen marapattalǵan. Kreatıvti oıyn damytyp, shyǵar­mashylyq jumystarmen aınalysý barysynda halyqaralyq, respýblıkalyq, oblystyq jáne qalalyq basylymdarda kóptegen maqalasy jaryq kórdi. Bul eńbekteri de joǵary baǵalanyp, I dárejeli dıplom aldy. «Ustazdyń eńbeginiń jemisi, ol shákirtiniń jeńisi» demekshi, muǵalimniń búkil maqtanyshy – shákirtteri. «Meniń shákirtterim bilim deńgeıin shyńdaý maqsatynda qalalyq «Altyn urpaq», «Altyn qyran», «Zerde» respýblıkalyq ǵylymı jobalar konkýrstaryna, matematıkalyq «Samuryq», halyqaralyq «PONI» ıntellektýaldyq saıys­taryna, taǵy basqa túrli pándik olımpıadalarǵa, baıqaýlarǵa qatysyp, bas júldelerdi enshilep keledi. Ár oqýshyma ózim úlgi bolyp, boıyndaǵy tabıǵı darynyn ashýǵa, bolashaqtaryna jol silteýge, jeke tulǵa bolyp qalyptasýlaryna bar kúshimdi salyp, aıanbaı eńbek ete beremin. Abyroı qajyrly eńbek pen kóp ýaqyt bólýdi talap etetini anyq. Dese de, eńbegim esh ketken emes. Shákirtterim árdaıym júldeli oryndardy ıelenip, eńbekke degen qulshynysym arta túsýde», deıdi R.Kerimbekova.

Eseli eńbeginiń taǵy bir jemisi – «100 jańa esim» jobasynyń jeńimpazy atanýy. «Bul táýelsiz elimizdiń týyn asqaqtatar jáne de elim, jerim deıtin jastardy qoldaıtyn joba. Jasyratyny joq, jobaǵa qatysyp, jeńimpaz bolý maǵan úlken rýhanı baılyq, serpilis berdi. Bizdiń memleket jas­tardy qalaı qoldap jatqanyna kýá boldym. Elimizdiń túkpir-túkpirinen kelgen talantty jastarmen tanysý meniń boıymda erekshe sezim qaldyrdy. Bul jobadan alǵan áserimdi bir sózben aıtyp jetkizý múmkin emes. Elimizdiń ár salasynan túrli jobalardy usynyp otyrǵan jastardy, ózim sekildi tulǵalardy kórgenimde kókiregimdi qýanysh kernedi. Prezıdent Qasym-Jomart Kemeluly Toqaevtyń «Ár ulttyń betke ustar qaımaǵy bolady. Ultty elge tanytatyn, órkendetetin de naǵyz sizdersizder!» dep joba jeńimpazdaryna joǵary baǵa berýi qatysýshylardyń boıyndaǵy um­tylysty, bolashaqqa degen senim men qushtarlyqty odan ári qanattandyra túskenine senimim mol. Jobanyń jeńimpazy bolý – óte úlken mártebe! Meniń ustazdyq eńbek jolymdaǵy qyzmetimdi baǵalap, daýys berip, shynaıy qoldaý kórsetken áriptesterime, halyqqa alǵysymdy bildiremin!», deıdi Roza Arshabaıqyzy aǵynan jaryla.

Túrkistan oblysy, Tóle bı aýdanynda dúnıege kelgen Rozanyń ata-anasy da ómirin bala oqytýǵa arnaǵan jandar. Ákesi Arshabaı – tarıh pániniń, anasy Ánıpa – basta­ýysh synyp muǵalimi. «Tárbıe basy – talbesikten» demekshi, áke-sheshesin úlgi tutyp muǵalim mamandyǵyn tańdapty.

«Qazaqstannyń 100 jańa esimi» aýqymdy jobasynyń IV maý­symy kezeńiniń jeńimpazy Roza Kerimbekova búginde latyn álippesin mektep tabaldyryǵyn attaǵan jetkinshekterge úıretip, osy baǵytta tııanaqty is-sharalardyń uıytqysy bolýdy maqsat etip otyr.