Almatylyqtar ál-Farabı dańǵyly mańynda salynyp jatqan iri qurylysqa shaǵymdandy. Turǵyndar onda qurylys salý erejeleri buzylǵan dep sanaıdy. Shaǵymdarǵa qurylys kompanııasy jaýap berdi, dep habarlaıdy Egemen.kz.
Qala turǵyndary Markov - Seıfýllın - ál-Farabı - Popov kósheleri sharshysynda salynyp jatqan turǵyn úı keshenine qatysty shaǵym aıtty. Ekobelsendi Saltanat Táshimova Facebook-paraqshasynda qurylys salýshy kompanııa erejelerdi buzyp qana qoımaı, qala turǵyndaryn aldaǵanyn jazdy.
«Saıtta bes úıdiń sýreti kórsetilgen. Biraq satý bóliminde 27 úıdiń qurylysy týraly aıtylady. Qurylys jaqyn mańdaǵy úılerdiń bárin jaýyp qalady. Turǵyndarǵa taýlardyń kórinisi burynǵydaı kórinbeıdi. Onyń ústine taýdan túsetin jolǵa tym jaqyn salynyp jatyr...», dep jazdy ekobelsendi Tashımova
Qurylys salýshy kompanııanyń málimeti boıynsha, toǵyz gektar aýmaqta úsh kireberisi bar úsh, eki kireberisi bar tórt jáne 12-den 19 qabatqa deıingi toǵyz bir kireberisti úıler salynyp jatyr.
«Keshen aýmaǵyndaǵy ǵımarattar aýa aǵynyna kedergi keltirmeıtindeı ornalasqan. Qazirgi ýaqytta qurylystyń birinshi kezeginde eki úıi salyndy. 2-shi jáne 3-shi kezektiń qurylysy jalǵasyp jatyr. Qala ákimdigi qol qoıǵan memorandýmǵa sáıkes, qalalyq mektep qurylysyn salýǵa kiristik. Jańa ǵımarat eki aýysymda 600 oryndy qamtamasyz etedi. Aýmaqta eki balabaqsha salynady, munda sport keshenderi, densaýlyq saqtaý ortalyqtary men balalar stýdııalary, street retail bólmeleri qarastyrylǵan», dedi kompanııa ókili.
Uıym málimetine súıensek, jobanyń ereksheligi - kógaldandyrý júıesinde. Sondaı-aq qurylys kompanııasy ǵımarattardyń seısmıkalyq tózimdiligine erekshe nazar aýdarǵan.
Qalalyq josparlaý jáne ýrbanıstıka basqarmasynyń basshysy Almashan Ahmedjanov turǵyn úı kesheni 2018 jyly kelisilgenin aıtty.