Býdapeshte ótip jatqan álem chempıonatynda búgin, ıaǵnı jarystyń tórtinshi kúni erler 81 kılo jáne áıelder 63 kılo salmaq dárejeleriniń júldeleri úshin talasty, dep habarlaıdy Egemen.kz.
Erler arasynda bas júlde úshin belgııalyq Mattıs Kaas pen grýzııalyq Toto Grıgalashvılı aıqasty. Shıelenisti básekeniń qosymsha ýaqytynda Kaas jeńiske jetti. Qola medal úshin básekede nıderlandtyq Frank de Vıt japonııalyq Sataro Fýdzıvarany utsa, portýgalııalyq Anrı Egýtızde ózbekstandyq Sharofıddın Baltoboevtan basym tústi.
Áıelder saıysynda Klarıss Agbenenýge teń keler eshkim tabylmady. Ataǵy jer jarǵan Fransııa dzıýdoshysy barlyq qarsylasyn bet qaratpaı utyp, aqtyq synda slovakııalyq Andreıa Lekshkıden basym tústi. Osylaısha, Agbenený altynnan alqa taǵyndy. Al nıderlandtyq Sanne Vermer men serbııalyq Anıa Obradovıch qola medaldi ıelendi.
Esterińizge sala keteıik, búgin bizdiń balýandar arasynan tek Dıdar Hamza óner kórsetti. Tusaýkeser kezdesýinde lıvandyq Nasıf Elıasty jeńgen ol kelesi aınalymda bolgarııalyq Ivaılo Ivanovqa ese jiberdi.