Elordada Prezıdenttik jastar kadrlyq rezervi forýmy ótti. «EKSPO» kesheninde bolǵan jıynǵa byltyr top jaryp iriktelgen rezervshiler, Prezıdent kómekshisi Erlan Qarın, Premer-Mınıstrdiń orynbasarlary Eraly Toǵjanov, Roman Sklıar, Aqparat jáne qoǵamdyq damý mınıstri Aıda Balaeva, Bilim jáne ǵylym mınıstri Ashat Aımaǵambetov, Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın, Mádenıet jáne sport mınıstri Aqtoty Raıymqulova jáne Indýstrııa jáne ınfraqurylymdyq damý mınıstri Beıbit Atamqulov qatysty.
Forýmnyń ashylýynda Memleket basshysy Qasym-Jomart Toqaevtyń quttyqtaý haty oqyldy. Prezıdenttiń lebizin Erlan Qarın jetkizdi.
«Barshańyzdy Prezıdenttik jastar kadrlyq rezervi forýmynyń ashylýymen quttyqtaımyn! Bul – júzden júırik, myńnan tulpar shyqqan úzdikterdiń basqosýy. Men jas urpaqtyń eldik múddege berik, memleketshil tulǵa bolyp ósýine basa mán beremin. Bilimdi de bilikti, belsendi ári otanshyl órenderge jol ashý – mańyzdy mindetterdiń biri. Biz olardyń jaýapty qyzmet atqaryp, shyńdala túsýine tolyq jaǵdaı jasaımyz.
Men baıqaý jeńimpazdarymen byltyr qańtar aıynda kezdestim. Aldaǵy mindetter týraly oıymdy ortaǵa salyp, baǵyt-baǵdar berdim. Sodan beri kópshiligińiz túrli laýazymǵa taǵaıyndaldyńyzdar. Bıyl aralaryńyzdan Májiliske eki depýtat saılandy. Sonymen birge eki azamat Ulttyq qoǵamdyq senim keńesine múshe boldy. О́ńirlerge baryp eńbek etip júrgen qyz-jigitterdi de bilemin. Jas mamandardyń elmen etene jumys isteýi – quptarlyq qadam. Sebebi bul – naǵyz ómir mektebi.
Munyń bári jas órkenniń áleýeti qanshalyqty zor ekenin kórsetedi. Prezıdenttik jastar kadr rezervinde bolý – talapty jastar úshin taptyrmas múmkindik ekeni anyq. Alaıda ony bılikke jetýdiń emes, halyqqa qyzmet etýdiń tóte joly dep bilý kerek. Shyn máninde eń úlken mártebe de, abyroı da osynda. Bıyl qasterli Táýelsizdigimizge 30 jyl tolady. Sizder – erkin elde týyp-ósken rýhy azat, sanasy ashyq azamatsyzdar. Qazaqstandy odan ári órkendeý – ózderińizge júkteletin úlken jaýapkershilik. Osy oraıda óskeleń urpaq el úmitin aqtaıdy dep senemin. Barshańyzǵa myqty densaýlyq, baq-bereke tileımin! Forýmnyń jumysy tabysty bolsyn!», delingen Prezıdent quttyqtaýynda.
Odan keıin Erlan Qarın kadrlyq rezervtiń sapasy máselesine toqtaldy. «Búgingi kezdesý – bizdiń jas áriptesterimizdiń uıymdastyrýshylyq kúsh-jigeriniń nátıjesi, bul Prezıdenttik jastar kadr rezervine shyn máninde belsendi jastar jınalǵanyn taǵy da dáleldeıdi. Prezıdenttik kadrlyq rezerv belsendi damyp keledi. Kadr rezerviniń ishinde de deńgeıles baılanystardyń damyp jatqany meni qatty qýantady. Árdaıym rezervtiń ishinde talqylaýlar, pikirtalastar bar ekenin kóremin. Bizdiń jas áriptester únemi kezdesedi, bastamalar kóteredi», dep atap ótti E.Qarın.
Prezıdent kómekshisi sońǵy ýaqytta rezervshiler tarapynan túrli taldamalyq materıaldar, usynymdar túse bastaǵanyn basa aıtty.
«Bul rezervshilerdiń uıymdastyrýshylyq áleýeti de, zııatkerlik áleýeti de zor ekenin taǵy da kórsetedi. Bizdiń mindetimiz – tek jumysqa ornalastyrý ǵana emes, biz úshin eń bastysy, ózara sapalandyrýdyń turaqty prosesi bolýy tıis», dedi Prezıdent kómekshisi.
Forýmǵa qatysqan Indýstrııa jáne ınfraqurylymdyq damý mınıstri Beıbit Atamqulov ta jastarǵa óz lebizin jetkizdi.
«Keıbir elderdiń zańdary ondaǵan, tipti júzdegen jyldar boıy ózgermeıdi. Osylaı qabyldandy, bitti. Árıne, ýaqyt ózgeredi, jańa býyn keledi, qandaı da bir syn-qaterler paıda bolady. Biraq turaqtylyq olardyń ósýine jáne únemi alǵa jyljýyna kómektesedi. Munda valıýtanyń turaqtylyǵyn, zańdardyń turaqtylyǵyn, erejelerdiń turaqtylyǵyn jáne basqalaryn aıtamyz. Sondyqtan sizder úshin, kóshbasshylar úshin ómirlik qaǵıdalardyń biri – ishki turaqtylyq, ishki arqaý, ishki tazalyq pen tártip erejesi bolýy kerek. Bul qaǵıdalardy buzýǵa bolmaıdy. Bir nárseni sheshý úshin bir ret buzsańyz, ishińizde dısbalans ornaıdy. Bul dısbalansty toqtatý qıyn jáne adam maıatnıkteı shaıqalýy múmkin. Al mundaı adam kóshbasshy jáne jetekshi bola almaıdy. Bolǵan kúnniń ózinde de jaqsy jetekshi bola almaıdy», dedi ol.
Mınıstr árqashan oń nátıjege jetýge maqsat qoıý qajettigine toqtaldy. «Kez kelgen isti bastaǵanda árqashan onyń nemen aıaqtalatynyn oılaý kerek. Jáne nátıje árqashan oń bolýy tıis. Sizderde ambısııa bar. Barlyq adamǵa ambısııa kerek. Alǵa shyǵyp, óz sońynan top erte alýy úshin durys ambısııa qajet dep oılaımyn. Taǵy bir aıtarym, jegen taǵamnan bastap, júris-turysqa, aqparatty tutynýǵa, adamdarmen sóılesýge ishki fıltr ornatýǵa tyrysyńyzdar. Aınalany jaqsy adamdarmen qorshap, óz isterińizdiń sheberi bolyńyzdar», dedi B.Atamqulov.
Prezıdenttiń jastar kadrlyq rezervi músheleri de óz tájirıbeleri týraly aıtyp berdi. Bas qosqan jastar talqylaý barysynda elimizdegi birqatar máseleniń basyn ashyp, keleshekke josparlarymen bólisti.