Almaty PD baspasóz qyzmeti abaısyzda áıel adamdy qaǵyp óltirgen polıseıden jaýap alý sátiniń vıdeosyn jarııalady, dep habarlaıdy Egemen.kz.
Qalalyq patrýldik polısııa polkiniń ınspektory Baqtııar Tóleýtaı jol-kólik oqıǵasynyń mán-jaıyn aıtty.
Eske salaıyq, qaıǵyly oqıǵa 14 maýsym kúni tańerteń Alataý aýdanynda bolǵan.
«Saǵat 6:45 shamasynda О́temisuly kóshesimen ońtústik baǵytqa qaraı ketip bara jatqanymda, aldymdaǵy avtokólik solǵa qaraı burylmaq bolyp, men ol avtokólikten qashyp, jol-kólik oqıǵasyn boldyrmaý úshin kólik jýý jaqqa buryldym. Sol kezde aldymda turǵan áıel adamdy baıqaýsyzda qaǵyp kettim», dedi ol.
Polıseı kinásin tolyq moıyndady, ol marqumnyń otbasyna qaıǵyryp kóńil aıtty.
Buǵan deıin bul derek Qylmystyq kodekstiń 345-baby boıynsha tirkelgeni habarlanǵan edi. Is Almaty PD anyqtaý basqarmasynyń óndirisinde. Júrgizýshimen tergeý sharalary júrgizilip jatyr.