Shymkenttegi juqpaly aýrýlar ortalyǵyna 20 sáýir kúni jetkizilgen 38 jastaǵy júkti áıeldiń jaǵdaıy nasharlap, jansaqtaý bólimine jatqyzylady. Naýqastyń ókpesi 98 paıyzǵa zaqymdanýyna baılanysty respýblıkalyq dárejedegi dárigerler konsılıým ótkizip, naýqasty EKMO apparatyna qosqan. Dárigerlerdiń aıtýynsha, bul apparat aýyr haldegi naýqastardy emdeýde nátıje bolmaǵan jaǵdaıda qoldanylady.
Apta óte ishtegi balanyń jaǵdaıy aýyr bolýyna baılanysty qalalyq perınataldyq ortalyqtyń dárigerleri shuǵyl túrde «kesir tiligi» arqyly áıeldi bosandyryp alǵan. Salmaǵy 1 kg 900 gramm bolyp týǵan nárestege ortalyq dárigerleri medısınalyq kómek kórsetip, qamqorlyq jasady. Jańa bosanǵan áıelge 14 kún boıy EKMO apparaty arqyly em júrgizildi. Dárigerler osy apparattyń arqasynda jańa bosanǵan áıeldiń jaǵdaıy jaqsarǵanyn aıtýda. Osylaısha qaýipti indet juqtyrǵan naýqas 50 kún boıy ınfeksııalyq gospıtalde em alyp, kúni keshe aýrýhanadan saýyǵyp shyqty.
Jadyra Baımahanova ómirin arashalap qalǵan Shymkent qalasynyń bas reanımatologi Batyr Shamamýtov, qalalyq juqpaly aýrýlar ortalyǵynyń akýsherlik bólimine jaýapty dáriger, anestezıolog-reanımatolog Aıjan Beıseńgirova, qalalyq júrek ortalyǵynyń kardıohırýrgııalyq anestezıologııa-reanımasııa jáne qarqyndy terapııa bóliminiń meńgerýshisi Bekjan Permenov, akýsher-gınekolog Anar Mahashova syndy bilikti aq halattylarǵa óz alǵysyn bildirdi.
Aıta ketelik, Shymkent qalasynda ótken táýlik ishinde 2 435 adam vaksına saldyrdy. Egý naýqany bastalǵaly barlyǵy 207 471 adam ekpe saldyrsa, onyń ishinde 111 647 adam vaksınanyń eki komponentin aldy. Al indet juqtyrý jaǵdaıy jóninde aıtar bolsaq, dúısenbidegi málimet boıynsha sońǵy táýlikte 42 jaǵdaı tirkelgen. Infeksııalyq stasıonarǵa 9 adam jatqyzylyp, 33 adam úı baqylaýyna alyndy. Qazirgi tańǵa mamandandyrylǵan ınfeksııalyq stasıonarlarda barlyǵy 1 276 oryn bar. Qala aýmaǵynda sanıtarlyq-epıdemııalyq talaptardyń saqtalýy boıynsha jumys isteıtin 20 mobıldik top jeksenbi kúni 187 nysanǵa tekserý jumystaryn júrgizdi. Onyń ishinde 8 nysanda karantın rejiminiń talaptary buzylǵany anyqtalyp, ákimshilik hattamalar toltyrylǵan.
Shymkent