Qostanaı oblysynda 6 myń jańa jumys ornyn ashýǵa múmkindik beretin jalpy quny 1,5 trln teńge turatyn 42 ınvestısııalyq joba júzege asyrylýda. Mysaly, byltyr Qarabalyq aýdanyndaǵy qus fabrıkasyn qaıta jandandyrý jumystary bastaldy. Al oblys ortalyǵyndaǵy mashına jasaý zaýyty óndiris aýqymyn keńeıtip, bıyl ǵana iske qosylǵan jańa jeliden sońǵy úlgidegi KIA avtokólikterin qurastyra bastady.
20 myń tonna qus eti óndiriledi
О́nerkásip pen aýyl sharýashylyǵy qatar damyǵan Qostanaı oblysynda bıyl birqatar aýqymdy joba qolǵa alyndy. Máselen, byltyr oblys basshylyǵy Qarabalyq aýdanynda birazdan beri turalap turǵan «Komsomol» qus fabrıkasyn qaıta jańǵyrtý týraly sheshim qabyldaǵan. Osylaısha mańyzdy jobany jergilikti Poultry-Agro jaýapkershiligi shekteýli seriktestigi júzege asyra bastaǵan. Jylyna 20 myń tonnaǵa deıin qus etin óndiretin kásiporyn iske qosylsa, Qarabalyqtyń mańaıyndaǵy eldi mekenderde turyp jatqan 260 adam turaqty jumyspen qamtylmaq.
14 mamyrda Qarabalyq aýdanyna jumys saparymen barǵan aımaq basshysy Arhımed Muhambetov aýdan ortalyǵyndaǵy qus soıý pýnktine arnaıy at basyn buryp, mundaǵy kúrdeli jóndeý jumystarynyń barysymen tanysty. Qazir ǵımaratty jóndeý, qaıta jabdyqtaý jumystary qyzý júrip jatyr. Qurylys basynda 82 adam eńbek etýde. Búginge deıin qus soıý pýnktiniń shatyry tolyqtaı jańartylyp, ǵımarattyń syrtqy jóndeý jumystary aıaqtalǵan. Seh ishindegi alyp tońazytqyshtar qaıta jóndelip, qus soıatyn jáne et bólshekteıtin sehtardaǵy jeldetkish júıesiniń jumysy jónge keltirilgen.
Qus fabrıkasynyń bas ǵımaraty – Qarabalyqtyń irgesindegi Gýrıanov aýylynda. Mundaǵy 11 qus qoranyń shatyry almastyrylyp, ǵımarattyń syrtyna jóndeý jumystary júrgizilip jatyr. Qoralardyń ishindegi qus ustaıtyn oryndardyń qurylǵylaryn jóndep, qalpyna keltirý jumystary da eńserilip qalǵan.
Poultry-Agro jaýapkershiligi shekteýli seriktestiginiń basshysy Qaırat Maıshevtiń aıtýynsha, kúrdeli jóndeý jumystary aıaqtalǵan soń, birden qus fabrıkasy da iske qosylady. Bıyl 5 myń tonna broıler etin óndirý kózdelip otyr. Aldaǵy jyly óndiris kólemi 12,5 myń tonnaǵa deıin artady. Al 2023 jylǵa qaraı kásiporyn tolyq óndiristik kúshine engen soń jylyna 20 myń tonnadan asa qus etin óndiredi.
Aýdannyń áleýmettik-ekonomıkalyq damýyna tyń serpin ákeletin ınvestısııalyq jobanyń jalpy quny 5,6 mlrd teńge bolady. Qomaqty qarjynyń kóldeneń kók attyǵa jem bolmaı, tıimdi jumsalýyn sybaılas jemqorlyqqa qarsy is-qımyl departamenti qamtamasyz etedi. Jemqorlyqqa qarsy qyzmet pen Poultry-Agro seriktestigi Protecting Business and Investments jobasy aıasynda ózara yntymaqtastyq ornatyp, osyndaı uıǵarymǵa kelip otyr.
– О́zara áriptestik sheńberinde biz bıznes ókilderine túrli bıýrokratııalyq kedergilerdiń, memlekettik organdar tarapynan jasalýy múmkin jónsiz tekserister men tosyn tosqaýyldardyń bolmaýyn qadaǵalaımyz. Al kásipkerge jemqorlyq táýekelderiniń paıda bolýyna sebep bolatyn jaǵdaılardy týyndatpaı, zań sheńberinde ǵana jumys istep, óz bıznesin adal júrgizý mindeti júkteledi. Bizdiń basty maqsatymyz – bızneske qolaıly jaǵdaı jasaý jáne qandaı da bir sybaılas jemqorlyq táýekelderine jol bermeý, – dedi sybaılas jemqorlyqqa qarsy is-qımyl departamentiniń basshysy Qýanysh Bekbasov.
KIA avtokóligine suranys joǵary
Oblysta avtokólik qurastyrý óndirisiniń damý qarqyny erekshe ekenin aıta ketken jón. Máselen, bıyl naýryz aıynda «Saryarqaavtoprom» seriktestigi ózbekstandyq áriptesterimen birlese otyryp Chevrolet avtokólikterin shyǵaratyn óndiris ornyn ashty. Munyń syrtynda «AgromashHoldıng KZ» AQ-da aýylsharýashylyq tehnıkalarynyń bólshekterin shyǵaratyn lokalızasııalyq ortalyqtyń qurylysy júrip jatyr. Oblystaǵy mashına qurylysynyń úlesi búginde 50 paıyzǵa jýyqtaǵan. Al mashına qurastyrý óndirisi jyl basynan beri bir jarym esege deıin ulǵaıdy. Aımaqta aldaǵy jyly KamAZ júk kólikterine arnalǵan jetekshi beldemeler shyǵaratyn shoıyn zaýytyn ashý josparlanyp otyr. Bulardyń bári – eksport baǵytyndaǵy jobalar. О́nimniń 90 paıyzy Reseıdiń «KamAZ» zaýytyna jiberiletin bolady.
Sonymen qatar Qostanaıdaǵy ındýstrııalyq aımaqta quny shamamen 80 mlrd teńge bolatyn jańa shoıyn quıý zaýytynyń qurylysy júrip jatyr. Taıaýda ǵana Qostanaıǵa jumys saparymen kelgen «KamAZ» JAQ bas dırektorynyń birinshi orynbasary Iýrıı Gerasımov oblys ákimimen kezdesti. Odan keıin ındýstrııalyq aımaqqa baryp, birlesken jobanyń júzege asyrylý barysymen tanysty.
– Biz Qostanaıdaǵy KamLitKZ zaýyty men jetekshi beldeme zaýytynyń iske qosylýyn asyǵa kútip otyrmyz. Qazir birlesken joba kezeń-kezeńimen ýaqtyly júzege asyrylyp jatyr. Eń bastysy, bul zaýyttarda jumys isteıtin bolashaq mamandar daıarlaý máselesin qatar qolǵa alyp otyrmyz. Mashına qurastyrý salasynyń mamandary bizge asa qajet. Biz KamAZ kólikterin shyǵaratyn bolsaq, kolledj sol kólikti qurastyratyn mamandardy daıarlaıtyn bolady. Qazir kolledjde 300-ge jýyq stýdent bilim alyp jatyr. О́z jataqhanasy bar. Onyń qurylysyna 1 mlrd 300 mln teńge baǵyttalyp otyr. Iаǵnı jan-jaqty qoldaý kórsetilip jatyr. Men búgingi kolledj stýdentteriniń bir-eki jyldan soń jańa zaýytqa jumysqa ornalasyp, odan ári kásiporynnyń bilikti mamany bolyp shyǵatynyna senim bildiremin, – dedi «KamAZ» JAQ bas dırektorynyń orynbasary.
Qostanaıda jańa salynyp jatqan KamLitKZ shoıyn zaýyty men qurylysynyń birinshi kezeńi bıyl qazan aıynda aıaqtalady. Zaýyt 2023 jyly túbegeıli salynyp bitedi dep josparlanyp otyr. Quny 80 mlrd teńge bolatyn aýqymdy joba iske qosylsa, munda 300-den astam jańa jumys orny paıda bolmaq.
Bıyl Qostanaıda KIA jáne Renault avtomobılderin qurastyratyn jańa jeli iske qosylyp, uzyn sany 18 dılerlik ortalyq ashyldy. Búginde Qostanaıda, sondaı-aq Nur-Sultan, Almaty jáne Shymkent shaharlarynda dılerlik ortalyqtar jumys istep jatyr. Osylaısha Sorento, Sportage, Rio krossoverleri sekildi álemge áıgili brendter Tobyl óńirinde óndirilip, saýdaǵa shyǵyp úlgerdi. Qazirdiń ózinde oblys ortalyǵynda osynda qurastyrylǵan on shaqty KIA Sorento markaly krossoverleri júr. Qostanaılyq Telman Isaev sońǵy úlgidegi «aqyldy» kóliktiń birin taıaýda ǵana satyp alypty.
– Jańa kóligimdi taıaýda ǵana satyp aldym. Qostanaıda qurastyrylǵan. Minip júrgenime eki apta ótti. Kóligimniń júrisi jeńil, ishi keń, jeti oryndyǵy bar. Bul kólik naǵyz otbasyna arnalǵan. О́zimniń eki balam bar, aldaǵy aıda eńbek demalysyna shyqsam, áıel, bala-shaǵamdy mingizip alyp, Tarbaǵataı taýlaryna baryp, tynyǵyp qaıtýdy josparlap otyrmyn. Ásirese, temir tulparymnyń dızaıny erekshe. О́te «aqyldy» mashına. Aldyńnan kezdesken kedergini baıqamaı qalsań, tejegish avtomatty túrde iske qosylady. Kóshedegi qarsy baǵyttardy bólip turatyn aq jolaqty ańdamaı basyp ketseń, kólik ózdiginen baǵytyn túzep jolaqtyń ortasyna túsedi. Toq eterin aıtqanda, qolaıly ári senimdi krossover, – dedi jańa kóliktiń ıesi.
Qazaqstan AvtoBıznes qaýymdastyǵynyń málimetinshe, 1 mamyrǵa deıin ishki naryqta Qostanaıda qurastyrylǵan 1 030 KIA kóligi satylyp ketken.
Qostanaı oblysy