Prezıdent Qasym-Jomart Toqaevtyń tapsyrmasyna sáıkes Shyǵys Qazaqstan oblysynyń Kúrshim aýdanynda Buqtyrma sý qoımasy arqyly ótetin kópir qurylysynyń kapsýlasyn salý rásimi ótti, dep habarlaıdy Egemen.kz.
Eki jolaqty avtomobıl kópiri Quıǵan aýylynyń janyndaǵy jasandy sý qoımasynyń eń jińishke ýchaskesinde salynady. Jobada kórsetilgendeı, kópirdiń uzyndyǵy 1,3 shaqyrymnan asady.
Qurylys aıaqtalǵan soń kópir Kúrshim men Kókpekti aýdandaryn jalǵaıdy. Merdiger kompanııa «OblShyǵysJol» JShS qurylysty 2024 jylǵa deıin aıaqtaýy tıis.
«El Táýelsizdiginiń 30 jyldyǵy qarsańynda Memleket basshysynyń tapsyrmasy boıynsha Buqtyrma sý qoımasy arqyly ótetin kópirdiń qurylysy bastalady. Bul oblys turǵyndary úshin kópten kútken mańyzdy oqıǵa. Jobanyń strategııalyq mańyzǵa ıe ekeni belgili. Ol shekaralas aýdandardy oblystyń basqa óńirlerimen baılanystyrady, jolaýshylar men júk tasymaly jeńildeıdi», dedi kapsýla salý rásiminde oblys ákimi Danıal Ahmetov.