Qazaqstan Prezıdentiniń kómekshisi – Prezıdent Ákimshiligi О́tinishterdi qaraýdy baqylaý bóliminiń meńgerýshisi Tamara Dúısenova óńir turǵyndaryna «e-О́tinish» aqparattyq júıesi men Ákimshilik rásimdik-prosestik kodekstiń talaptaryn túsindirdi. Bıylǵy 1 shildede kúshine enetin jańa Kodeks – Memleket basshysynyń 2019 jylǵy 2 qyrkúıektegi Qazaqstan halqyna Joldaýynda aıtylǵan «Halyq únine qulaq asatyn memleket» tujyrymdamasynyń irgeli normatıvtik qujaty.
Tamara Dúısenovanyń túsindirýinshe, Ákimshilik rásimdik-prosestik kodekske saı ótinishterdi qaraýdyń jańa tártibi engizilip otyr. Máselen, bıylǵy birinshi toqsanda Prezıdent Ákimshiligine 449 myńnan astam aryz túsken. Onyń 50 paıyzy jergilikti atqarýshy organdardyń úlesine tıesili eken.
– Buryn aryz 30 kún ishinde qaralatyn edi. Endi jańa Kodekstiń talabyna saı, 15 kúnde qaralady. Ár aryzǵa ákimshilik is ashylady, – dedi T.Dúısenova. – «e-О́tinish» – ótinishti qaraýdyń tarıhy saqtalatyn birtutas baza. Bul barlyq memlekettik jáne sot organdaryna, sondaı-aq ótinish berýshilerge qoljetimdi bolady. «e-О́tinish»-ke 1 shildeden bastap kezeń-kezeńmen ótý bastalady. Azamattardyń ótinishteri memlekettik organdarǵa birtutas aqparattyq júıe arqyly túsedi.
Oblys ákiminiń birinshi orynbasary Serik Aıdarbekovtiń málimetinshe, Memleket basshysy Qasym-Jomart Toqaev usynǵan halyqtyń barlyq syndarly ótinish-tilegin jedel ári tıimdi qarastyratyn «Halyq únine qulaq asatyn memleket» tujyrymdamasyna oraı qazir Atyraý qalasy men jeti aýdanda servıstik ákimdikter iske qosyldy. Al jańa Kodeks talaptaryn túsindiretin memlekettik qyzmetshiler arnaıy oqý kýrsynan ótip, tıisti sertıfıkat aldy.
– Qazir «e-О́tinish» aqparattyq júıesine 213 memlekettik mekeme qosylyp, ótinishterdi óńdeý jumysy uıymdastyrylyp otyr. Azamattardyń quqyǵyn qorǵaý baǵytynda iske asyrylatyn reformalardyń mańyzdylyǵy eskerilip, aldaǵy ýaqytta bul jumys oblystyq ákimdiktiń tikeleı baqylaýynda bolady, dedi Serik Aıdarbekov. – Turǵyndardyń ózekti máselelerdi qozǵaǵan ótinishteri jer, turǵyn úı, jumyspen qamtý, áleýmettik kómek kórsetý, bilim berý men densaýlyq saqtaý salalaryn qamtydy.
Onyń aıtýynsha, jyl basynan beri óńirdiń jergilikti atqarýshy organdaryna 16 myńǵa jýyq ótinish túsip, onyń 20 paıyzy qanaǵattandyrylypty. Al qalǵanyna zańǵa sáıkes jaýap berilipti.
Atyraý oblysy