Qaraǵandy oblysy «qyzyl aımaqta» eki aıǵa jýyq ýaqyt boldy. Munyń ózi óńirdegi epıdemııalyq jaǵdaıdyń qanshalyqty kúrdelenip ketkenin kórsetti. Áıtse de, keshendi túrde júrgizilgen jumystardyń nátıjesinde qalyptasqan jaǵdaı ońalyp, óńir «sary aımaqqa» ótti.
Sanıtarlyq-epıdemııalyq salanyń mamandary endi osy kórsetkish tipti jaqsaryp, syrqattardyń sany azaıa beretin bolsa, onda óńirdegi karantındik shekteýler sheńberiniń kemı túsetinin aıtady.
Indet oshaqtaryna taldaý júrgizgen sarapshy mamandar aýrýdy juqtyrýdyń oqıǵalary úı jaǵdaıynda kóp bolatynyn anyqtap otyr. Mundaǵy kórsetkish 26 paıyzdy quraǵan. Qoǵamdyq kólikte júrip juqtyrǵandardyń da úles salmaǵy mol. Avtobýstarmen ári-beri júrip, jaman indetke urynǵandardyń kórsetkishi 16%-ǵa jetipti. Al aýyrǵandardyń arasynda jas shamasyna qaraı zeınetkerler top basynda tur. Olardyń úles salmaǵy 25%-dy qurasa, 21% kórsetkishi bar jumys istemeıtinder de egde adamdardan qalysar emes.
Qazirgi tańda óńirde ómirdiń tynys-tirligi óziniń burynǵy qalypty jaǵdaıyna qaıta kele bastaǵanyn aıta ketken lázim. Buǵan, ásirese, Ashyq jobasynyń yqpaly zor bolyp tur. Atap aıtqanda, atalǵan mobıldi qosymsha iske qosylǵaly jumys isteýge ruqsat etilgen kásipkerlik nysandar qarasy molaıǵan.
Búginde oblysta bas sanıtarlyq dárigerdiń ruqsat etýimen balalardyń oıyn-saýyq ortalyqtary, sırk, qonaqúıler jumys isteı bastady. Álbette bul jerlerde sanıtarlyq talaptar áli de bolsa qatań saqtalady. Máselen, balalar ortalyqtarynda bir mezgilde 30-dan asa jetkinshek bolmaýy kerek. Úlken ortalyqtarda 60 adamǵa deıin ǵana bolýǵa ruqsat berilgen. Al endi otelder men qonaqúılerge adam sany jaǵynan shekteýler qoıylmaıdy.
Budan bólek turǵyndardy qýantqan taǵy bir jańalyq – demalys kúnderi oblys ishinde júretin jolaýshylar tasıtyn avtobýstardyń marshrýttary jandana bastady. Qazir oblys ortalyǵynan óńirdegi qalalar men eldi mekenderge esh shekteýsiz qatynaýǵa bolady.
Qazir – balalardyń kanıkýl ýaqyty. Osyǵan oraı olar baratyn jerlerdiń de jumysy «tirile» bastady. Degenmen 12 jastan asqan jetkinshekter kompıýter klýbtaryna, sırk pen kınoteatrlarǵa Ashyq mobıldik qosymshasynan erikti túrde ótip baryp kire alady.
Taǵy bir aıta ketetin jaıt, jobaǵa qatysýshy kásipkerlik nysandar basqa da platformalardy paıdalana alady. Mysaly egov mobile, Aitu, Kaspi.kz, Halyk Bank, Sberbank.kz sııaqty qosymshalar turǵyndarǵa qyzmet etýge árqashanda daıyn.
Aıta ketý kerek, ótken táýlikte Qaraǵandy oblysynda 160 adamnyń koronavırýs ınfeksııasyn juqtyrǵany anyqtaldy. Al keıingi túsken málimetke saı, sońǵy táýlikte óńirdegi 115 naýqas syrqattan aıyǵyp shyqqan.
Qaraǵandy oblysy