Qyzǵylt qum. Alyp ańǵar. Ertegi pishindi qamaldar. Eldiń kózine túsýge qorqatyn ǵajaıyp saılar. Ańyzǵa júk bolǵan alyp mekenniń bir buryshy. Aqıqatyn eshkim arshyp ala almasy anyq. Sebebi mıllıon jyl buryn jerdi jaryp shyqqan tabıǵattyń kórkem sýreti adamzattan aılasyn asyryp tur. Ker dalanyń tósin qansha kemirse de endi pende ataýly mundaı týyndy týdyra almasy aqıqat.
Belgili sýretshi Andreı Latynınniń «Sharyn. Qamaldar jazyǵy» kartınasy bizdi Sharyn shatqalyna qaıta saparlaǵandaı kúıge bóledi. Mýzeıde ornalasqan bul jádigerdi shetelden saıahattap kelgen qonaqtar tańdana da, tańyrqaı da qaraıtyny kópke málim. Kórkem kartınaǵa qazaq dalasynyń barlyq bolmysy sińgendeı.
AQSh-taǵy Grand-Kanon týraly bári biledi, biraq soǵan uqsas tabıǵı jaratylysty Qazaqstannan da kórýge bolatynyn biri bilse, biri bilmesi haq. Almaty qalasynan 200 shaqyrym qashyqtyqta ornalasqan qutty mekendi amerıkalyq shatqaldyń «inisi» dep te ataıdy. Jetisýdyń orta bóliginde myńjyldyqtar jumbaǵyn ishine búgip dańqy alysty sharlaǵan Sharynnyń jas-shamasyn naqty atap bergen eshkim joq. Shókpeli jynystardan quralǵan tabıǵı eskertkishtiń jasy shamamen 12 mıllıon jylǵa barady. Jasyl jazyqtyń ortasynan ashylǵan jumyrtqadaı paıda bolǵan qyzǵylt aılaq.
Kartına realızm stılimen taý peızajy janrynda maıly boıaýmen jazylǵan. Sýretshi shatqaldardyń árbirine erekshe mán berýge tyrysqan. Árqaısysyna jeke-jeke maǵyna berip, kenep betin túrli reńkke toltyrǵan.
Bizdiń kóz aldymyzda ǵajaıyp taý silemderi, ýaqyt pen jel tilimdegen jartastar, beımálim úńgirler, qýań dala jáne bultty kógildir aspan astynda osylardyń arasymen aǵyp jatqan ózen keledi. Sýretshi kók tús arqyly kóleńkege basymdyq beredi. Bul kartınaǵa áser berip, josa, qum sııaqty jyly taý tústeri men shatqaldyń kóleńkeli jaqtarynyń arasyna qarama-qaıshylyq jasaıdy, ári shýaqty kúndi erekshe sezindiredi.
Sýretshi týyndysynda Qazaqstan tabıǵaty qula dalasy da, ormandary da, shatqaldary da bar sonshalyqty alýan túrli ári san qyrly ekenin kórsetedi.