Elimizde 353 mádenıet nysany jetispeıdi. Bul týraly QR Prezıdenti janyndaǵy Adam quqyqtary jónindegi komıssııa otyrysynda Mádenıet jáne sport mınıstri Aqtoty Raıymqulova aıtty, dep habarlaıdy Egemen.kz.
«Jergilikti atqarýshy organdardyń aqparatyna sáıkes, búginde respýblıka óńirlerinde 353 mádenıet nysany, onyń ishinde 127 mádenıet úıi, 113 kitaphana, 85 aýyldyq klýb, 10 teatr, 8 mýzeı, 2 konsert zaly jáne 2 mádenı-demalys uıymdary jetispeıdi. Sonymen qatar júrgizilgen taldaý mádenıet nysandaryn ońtaılandyrýǵa baılanysty jergilikti atqarýshy organdar tarapynan mádenıet salasyndaǵy ǵımarattardy qysqartý úrdisi júrip jatqanyn kórsetedi», dedi mınıstr.
Mınıstrdiń aıtýynsha, óńirlerde mádenıet uıymdaryn jappaı biriktirý/qosý boıynsha tájirıbe barlyq jerde qoldanylady. Sol arqyly turǵyndardyń mádenı qundylyqtarǵa qoljetimdiligi, ásirese monoqalalar men aýyldyq jerlerde shektelip otyr.
«Jergilikti atqarýshy organdarǵa turǵyndarǵa mádenıet uıymdarynyń, ásirese aýyldaǵy qyzmetterine eń az qoljetimdilikti qamtamasyz etý maqsatynda monoqalalardaǵy, aýdandyq jáne aýyldyq deńgeıdegi mádenıet uıymdary jelisiniń eń tómengi memlekettik normatıvterin saqtaý usynylady. О́z kezeginde, mádenıet uıymdarynyń qyzmetterine teń qoljetimdilikti qamtamasyz etý jastar tulǵasynyń damýyna oń áserin tıgizedi. Balalar men jasóspirimderdiń áleýmettenýi men shyǵarmashylyq áleýetin damytýdy qamtamasyz etedi», dedi Aqtoty Raıymqulova.