«Astana keshteri» halyqaralyq óner festıvali COVID-19 indetimen baılanysty shekteýlerden keıin elordanyń sahnalyq alańdaryna qaıta oraldy, dep habarlaıdy Egemen.kz.
Bıyl óziniń 10 jyldyq mereıtoıyn atap ótetin bul qaıyrymdylyq joba «MuzVac - úzdikmýzykalyq vaksına!» uranyn arqaý etip, Elorda kúnin merekeleý aıasynda ótkizilýde. «Astana keshteri» festıvaliniń konsertterin elordalyq óner súıer qaýym 18-20 maýsym kúnderi aralyǵynda tamashalaı alady. Konsertterdiń basty qonaqtary – beıbit kúnniń batyrlary atanyp, pandemııa ýaqytynda koronavırýspen aıanbaı kúres júrgizgen medısına qyzmetkerleri.
Festıvaldiń alǵashqy konserti «Astana Opera» teatrynyń kameralyq zalynda ótti. «Kóshpeli áýender» dep atalatyn jańa konsertti Italııadan kelgen mýzykanttar Fılomena de Paskýale (fleıta) men Djordjo Albıanı (gıtara) usyndy. «Kontrapýnkt» degen dýetke birikken ıtalıandyq ártisterdiń óneri kórermenderdi asqan sheberligimen jáne úılesimdiligimen tamsandyrdy. «Kontrapýnkt» dýetiniń mýzykanttary Argentına, Brazılııa, Ispanııa, Fransııa, Italııa kompozıtorlarynyń týyndylaryn oryndady. Fleıta men gıtaranyń erekshe áýezdiligi sheteldik avtorlardyń keremet mýzykasyna erekshe máner berip, ózgeshe órnek qosty.
Ártisterdiń aıtýynsha, olar bul konsertte erekshe tolǵanyspen óner kórsetken.
– Uıymdastyrýshylar tarapynan dárigerlerge kórsetilgen erekshe qurmet «Astana keshteri» festıvaliniń izgi maqsatyn, áleýmettik mańyzyn aıqyndaı túsedi. Sebebi densaýlyq – adam ómirindegi basty qundylyq. Mýzykamen, tipti basqa kez kelgen jumyspen aınalysý úshin, eń bastysy, densaýlyq kerek. Al adam densaýlyǵy – dárigerlerdiń qolynda. Aýrýdy emdeý jáne adamdardy saýyqtyrý – bul medısına qyzmetkerleri men mýzykanttarǵa ortaq maqsat. Jaqynda medısına salasynda paıda bolǵan «Mýzykalyq terapııa» baǵyty osy tujyrymdy dáleldeıdi. Sebebi mýzyka adamnyń jany men rýhanı sanasyna ıgi áser etedi.
Pandemııa ómirdegi qundylyqtarǵa basqasha qaraýǵa úıretti, tipti mýzykanyń ózin biz qazir basqasha tyńdaımyz. Ony búgingi konsertke jınalǵan óner súıer qaýymnyń yqylasy kórsetti. Mýzyka, shekaralarǵa qaramastan, bizdi búgin qazaqstandyq kórermendermen tabystyrdy, - dedi Djordjo Albıanı.
Bul keshte Italııanyń úzdik mýzykanttarynyń oryndaýynda shyrqalǵan ár shyǵarma medısına qyzmetkerleriniń qurmetine arnalyp, olarǵa rýhanı kúsh-qýat syılady. Konsertten keıin dárigerler festıvaldiń uıymdastyrýshylary – «Degdar» gýmanıtarlyq qory, Nur-Sultan qalasynyń ákimdigi jáne JTI kompanııasyna shynaıy alǵystaryn bildirip, jyly lebizderin jetkizdi.
Uıymdastyrýshylar málimdegendeı, «Astana keshteri» festıvali áli 2 kún jalǵasady. 19 maýsym kúni «Astana Operanyń» kameralyq zalynda pıanıst Georgı Mýndrovtyń (Germanııa) konserti usynylady. Festıvaldiń basty is-sharasy – «MuzVac - úzdik mýzykalyq vaksına!» atty konsert 20 maýsym kúni «Qazaqstan» OKZ-da ótedi. Úlken konserttiń qatysýshylary – belgili otandyq ártister men óner ujymdary jáne Italııa men Shvesııanyń óner juldyzdary. Konsertke Nur-Sultan qalasy emhanalarynyń qyzmetkerleri shaqyrylady. Konsertte barlyq sanıtarlyq normalar saqtalady. Kórermender konserttik zalǵa«Ashyq» júıesi arqyly kire alady.