Túrkistan oblysynyń ákimi О́mirzaq Shókeev Ortalyq kommýnıkasııalar qyzmetiniń kóshpeli brıfınginde «Kerýen saraı» nysanyn salýda qandaı qurylys materıaldary qoldanylǵanyn aıtty, dep jazady Egemen.kz.
«Ol jerde kún saıyn júrdim. Ol temir-betonnan, armatýradan salynǵan. Bul jerde barlyǵy da óńirde seısmıkalyq qaýip tómen bolǵandyǵyna qaramastan úlken saqtyqpen josparlanǵan. Árıne, ártúrli ishki materıaldar, qabyrǵa materıaldary qoldanylǵan. Kelýshilerdiń biri sol materıaldy baıqap qalyp, búkil Kerýen saraı sonymen salynǵan dep oılapty. Bul qarapaıym materıal. Eger ol qurylystan habary bolsa mundaı jazbaıtyn edi. Jalpy, Sembol álemdik kompanııa sanalady. Ol óziniń abyroıyn qatty baǵalaıdy. Olar mundaı jaıt úshin abyroılaryna kelgen nuqsanǵa baılanysty jaýapqa da tartýy múmkin», dedi О́mirzaq Shókeev.
Sondaı-aq ol mundaı materıaldar qurylysta nelikten jıi qoldanylatynyn túsindirdi.
«Ol óte arzan ári tıimdi. Jalpy, qazirgi álemde barlyǵy platmassadan jasalady. Myna ústel, qalamsap, mıkrofon plastmassadan jasalǵan. Sondyqtan menińshe, joq jerden túsiniksiz haıp jasap otyr. Mundaı jaıtty aıtqan kezde jaýapkershiliktiń de bolǵany durys-aý. О́ıtkeni, biz týrısterdi tartqymyz keledi. Sheteldik ınvestorlardyń qarajatyn tartýǵa umtylamyz», dedi oblys basshysy.