Parlament palatalarynyń birlesken otyrysynda QR Konstıtýsııalyq Keńesiniń Respýblıkadaǵy konstıtýsııalyq zańdylyqtyń jaı-kúıi týraly jyl saıynǵy joldaýy tyńdaldy, dep habarlaıdy Egemen.kz.
«Bıylǵy jyl Qazaqstan Respýblıkasy Memlekettik táýelsizdiginiń 30 jyldyǵymen erekshelenip otyr. Uly Dala eliniń derbes memlekettiligin qalyptastyrýdaǵy sheshýshi qadamdar elimizdiń Tuńǵysh Prezıdenti-Elbasy Nursultan Nazarbaevtyń bastaýymen 1995 jyly 30 tamyzda Búkilhalyqtyq referendýmda qabyldanǵan qoldanystaǵy osy Konstıtýsııa aıasynda júzege asyryldy.
Qazaqstan Respýblıkasynyń Prezıdenti Qasym-Jomart Toqaev atap ótkendeı, «osynaý tolaǵaı tabystardyń bárine Elbasynyń dara kóshbasshylyǵynyń hám halqymyzdyń danalyǵy men parasatynyń, birligi men yntymaǵynyń, otandastarymyzdyń qajyrly eńbeginiń arqasynda qol jetkizdik», dedi Konstıtýsııalyq Keńestiń tóraǵasy Qaırat Mámı.
Onyń aıtýynsha, jaqynda bekitilgen Qazaqstan Respýblıkasynyń 2025 jylǵa deıingi Ulttyq damý jospary, Qazaqstan Respýblıkasynyń 2025 jylǵa deıingi jalpyulttyq basymdyqtary, Qazaqstan Respýblıkasynda memlekettik basqarýdy damytýdyń 2030 jylǵa deıingi tujyrymdamasy tıisti mindetterdi sheshýge qyzmet etedi.
Bul qujattardy iske asyrý qazirgi kezeńniń syn-qaterlerin eńserýge baǵyttalǵan jáne orta merzimdi perspektıvada, halyqtyń turmys sapasy men tabysynyń shynaıy artýymen qosa júretin, eldiń ornyqty jáne sapaly ekonomıkalyq ósý jolyna baǵyt alýyn qamtamasyz etýge arnalǵan.
«Memlekettik egemendiktiń negizgi dińgekterin aıqyndaýda jáne iske asyrýda Konstıtýsııalyq Keńestiń sheshimderi mańyzdy ról atqarady.
Konstıtýsııalyq Keńestiń qaýlylarynda eldiń konstıtýsııalyq qurylysynyń negizderi, adamnyń jáne azamattyń quqyqtary men bostandyqtaryn qorǵaý, Respýblıka Prezıdentiniń, Parlamenttiń, Úkimettiń mártebesi men ókilettikteri, bılik tarmaqtarynyń ózara qarym-qatynasy, zań shyǵarý prosesi, sottardyń jáne ózge de memlekettik organdardyń quzyreti men qyzmetiniń mazmundary jan-jaqty túsindirildi», dedi Qaırat Mámı.
Konstıtýsııalyq Keńes elde quqyqtyq memleket qaǵıdattaryn nyǵaıtý jóninde naqty usynystar engizdi.
«Konstıtýsııalyq Keńestiń sheshimderin oryndaý prosesi jalǵasýda. Respýblıka Prezıdenti málimdegen jáne júrgizip otyrǵan qoǵam men memleketti odan ári demokratııalandyrý baǵyty konstıtýsııalyq baqylaý organynyń rólin arttyrýdy jáne Konstıtýsııalyq Keńes týraly zańnamany jetildirýdi talap etedi. Azamattardyń konstıtýsııalyq baqylaýǵa qol jetkizýin keńeıtý qajet.
Bul baǵytta sottardyń Konstıtýsııalyq Keńeske ótinish jasaý tártibin, taraptardyń qoldanystaǵy zańnyń konstıtýsııalyǵyn tekserý týraly ótinishterin qaraý tártibin ońtaılandyrý ózekti. Eýropa Keńesiniń Venesııa komıssııasy bul máseleler boıynsha oń qorytyndysyn berdi», dedi ol.