Esep komıtetiniń tóraǵasy Natalıa Godýnova Qazaqstanda syrtqy qaryzdardy qısynsyz tartý jáne paıdalaný boıynsha jeke jaýapkershilik engizý qajet ekenin aıtty, dep habarlaıdy Egemen.kz.
Godýnovanyń aıtýynsha, munaı-gaz sektoryna táýeldilik tólem balansy men ulttyq valıýtanyń turaqtylyǵyna qaýip tóndiredi. Sonymen qatar ol kásipkerlikti, ásirese ónerkásipti qoldaýǵa aıtarlyqtaı kúsh salý keregin aıtty.
«Memlekettik qaryzdyń ósýi eldegi makroekonomıkalyq turaqtylyq táýekelderin týdyrady. Qabyldanǵan boryshtyq mindettemeler boıynsha: qashan, qandaı kózderden jáne qandaı kólemde boryshty óteý josparlanǵanyn jáne bir-úsh jylǵa emes, kem degende 10 jylǵa naqty qalyptasqan nıet bolǵanyn qalar edik. Bul jerde aıqyndyq pen ashyqtyq qajet», dedi Godýnova Parlament palatalarynyń birlesken otyrysynda.
Sondaı-aq Natalıa Godýnova elimizde memlekettik organdardyń osy qyzmetin iske asyrý, halyqaralyq konsýltanttardy tartý jáne sheteldik tájirıbeni zerdeleý úshin qarjylandyrýdy syrttan tartý tájirıbesin alyp tastaý qajet ekenin aıtty.
«Osy mindetterdi iske asyrý úshin qarjylyq jáne adamı resýrstarymyz jetkilikti. Syrttan qaryzdardy utymsyz tartqany jáne paıdalanǵany úshin, sondaı-aq olardy ýaqtyly ıgermegeni, keıde olardyń kúshin joıǵany úshin jeke jaýapkershilik engizý talap etiledi. Bul týraly depýtattar da aıtty», dedi ol.