El Táýelsizdiginiń 30 jyldyǵyna oraı, Shý aýdanynda turatyn 20 qarııany Túrkistan oblysyna saıahatqa jiberý qolǵa alyndy, dep habarlaıdy Egemen.kz.
Atalǵan shara aýdan ákimdiginiń bastamasy negizinde jergilikti kásipkerlerdiń demeýshiligimen júzege asýda. Búginde qaıtadan túlep, jańǵyrǵan Túrkistan ólkesine sapar qarsańynda aýdan ákimi Nurjan Kalenderov jergilikti qarııalarmen kezdesip, pikir almasqan edi. Kezdesý barysynda qarııalar da osyndaı ıgi iske qoldaý kórsetken barsha azamattarǵa alǵys bildirgen bolatyn.
«El tarıhyndaǵy eleýli mereke qarsańynda qarııalarymyzǵa túrki áleminiń besigi bolǵan Túrkistan qalasyna saıahat jasatýdy jón kórdik. Kúni keshe sol qarttarymyzǵa aqjoltaı tilep, týrıster kóp baratyn shyraıly shaharǵa shyǵaryp salǵan edik. Túrkistanda buryn bolǵanmen, qalanyń tap qazirgi kórkeıgen kelbetin kórmegen aqsaqaldar az ýaqyt ishinde shahardyń jańa keıipke enip, adam tanymastaı ózgerip ketkendigine ózderiniń tańqalystaryn bildirdi. Osyndaı qurmetke aýdanymyzdaǵy 7000-ǵa jýyq barlyq zeınetkerler laıyqty. Olar búgingi beıbit te berekeli kún úshin beınet keship keldi», deıdi Nurjan Kalenderov.