Túrkistan oblysyndaǵy «Saıram-О́gem» shatqalynda iz-túzsiz joǵalyp, máıitteri tabylǵan tórt týrıstiń ólimine qatysty alǵashqy boljamdar aıtyldy, dep habarlaıdy Egemen.kz.
Olardy 28 kún boıy izdestirgen óńirdiń qutqarýshylary máıitterdiń barlyǵy О́gem ózeninen shyqqanyn jetkizdi.
Oblystyq TJD bastyǵynyń orynbasary Erik Sarybaevtyń aıtýynsha, jaıaý júrispen 2543 shaqyrym qaralsa, áýede tikushaqpen 16090 shaqyrym aýmaqta izdestirý sharalary júrgizilgen. Súńgýirler О́gem ózeniniń boıymen 22 shaqyrym jerdi qarap shyqqan. Nátıjesinde birinshi jigittiń máıiti tabylǵan jer men ekinshi týrıstiń máıitiniń arasy 6 shaqyrymdy quraǵan. Al, úshinshi men tórtinshi máıittiń arasy 7 shaqyrym jerden asqan. Qutqarýshylar alǵashqy boljam retinde tórteýi qol ustasyp, О́gem ózeninen birge ótpek bolǵan kezde sýǵa aǵyp ketýi múmkin deıdi. Alaıda sýdyń ekpini tym qatty bolǵandyqtan olardy aǵysy alyp ketýi múmkin ekenin joqqa shyǵarmaıdy. Al, ekinshi boljam retinde olardyń ózenniń tastar kóp jatatyn jeri Taskópirden ótpek bolǵan dep aıtylýda. Alaıda sýda jatqan tastardyń beti taıǵaq bolǵandyqtan biri aǵyp ketip, qalǵandary qutqaramyz dep oqtalǵan bolýy múmkin. Al, úshinshi boljam retinde aıýlardan qoryqqan.
«Izdestirý barysynda osy tóńirekte aıýlardy óte kóp kezdestirdik. Bir jıyrmadan asa aıýdy kórdik. Al aıýdyń ózine tán qasıeti - balalary úshin óte agressıvti bolatyn kez bul. Múmkin, bul jigitter ózendi boılap júrgen kezde aldarynan aıý shyǵyp qaldy ma. Sodan qoryqqanynan sýǵa sekirip ketti me degen jaǵdaılardy qarastyrdyq», deıdi Erik Sarybaev.
Al, izdestirý-qutqarý jumystaryna TJM Almaty qalasyndaǵy RJQJ-ǵy, Shymkent qalasy TJD, «Qazavıaqutqarý» AQ, Túrkistan oblysynyń PD, «Saıram-О́gem» memlekettik ulttyq tabıǵı parkiniń, eriktiler, О́zbekstan Respýblıkasy TJM, QR UQK Tólebı shekara qyzmeti, QR UU 6506 áskerı bóliminiń qyzmetkerleri jumyldyrylǵan.