Shymkent qalasynyń sanıtarlyq-epıdemıologııalyq jaǵdaıyn pysyqtaý maqsatynda qala ákiminiń tóraǵalyǵymen kezekti shtab otyrysy ótti. Aldymen álem elderine sholý jasalyp, elimizdiń jáne qalanyń búgingi ahýaly talqylandy, dep habarlaıdy Egemen.kz.
Jıynda baıandama jasaǵan densaýlyq saqtaý basqarmasynyń basshysy sońǵy táýlikte Reseı men AQSh-ta koronavırýs ınfeksııasyn juqtyrý jaıty tez ósim alǵanyn aıtty. Al, elimizde Nur-Sultan qalasy qyzyl aımaqta bolsa, Almaty qalasy men oblysy qyzyl men sary aımaq shekarasynda tur. Shymkent sońǵy aptada sary aımaqqa endi. О́tken táýlikte covid-19 ınfeksııasyn juqtyrǵan 50 jaǵdaı tirkelgen. Onyń ishinde 17 adam ınfeksııalyq stasıonarǵa jatqyzylyp, 33 adam úı baqylaýyna alyndy.
Sonymen birge, bir táýlik ishinde qalada 6220 adam vaksına aldy
(I komponent-3831, II komponent-2389). Egý naýqany bastalǵaly barlyǵy 243 390 adam vaksınasııalandy. Onyń ishinde 143 729 adam vaksınanyń eki komponentin alǵan.
Bas dáriger qaladaǵy emhanalar men dárihanalarda dári-dármek qorynyń jáne vaksınanyń jetkilikti ekenin aıtyp ótti. Monıtorıngtik top karantın talaptaryn saqtaý boıynsha kúndelikti tekserý jumystaryn júrgizip jatqandyǵyn, alaıda toıhanalarda mereıtoılardyń toqtamaı jatqandyǵyn jetkizdi.
Tóraǵa aýdan ákimderine toıhana ıelerimen kezdesip, túsindirý jumystaryn júrgizýdi tapsyrdy.
«Elimizde koronavırýstyń Úndi shtammy anyqtaldy. Demek, bosańsýǵa bolmaıdy. Infeksııanyń qaıta taralýyn boldyrmaý úshin daıyndyqty kúsheıtýimiz kerek. Turǵyndarǵa vaksınanyń jetkilikti, búginde jalǵyz tıimdi sheshim ekpe saldyrý ekenin durys túsindirý mańyzdy. Qazir qaladaǵy vaksınalanýǵa jatatyn turǵyndardyń 44 paıyzy ekpe saldyrǵan. Osyny tolyq kólemde júzege asyrsaq, qaıta qalypty ómir saltyna oralar edik. Monıtorıngtik toptyń jumysy kúsheıtilsin. Barshańyzdy jaýapkershilikpen jumys jasaýǵa shaqyramyn», dep sózin túıindedi qala ákimi M.Áıtenov.