Almaty ákimi Baqytjan Saǵyntaev Ortalyq kommýnıkasııalar qyzmetindegi baspasóz konferensııasynda jýrnalısterdiń suraqtaryna jaýap bere kele, metro qurylysynyń qarqyny týraly baıandady, dep habarlaıdy Egemen.kz.
B. Saǵyntaevtyń aıtýynsha, metro qurylysynyń kidirýine pandemııa yqpal etti, sonyń saldarynan jumysshylar men mamandardyń jumysqa shyǵýy shekteldi jáne shekara jabyq boldy.
«Metronyń birinshi jelisiniń ekinshi kezeńiniń ekinshi iske qosý kesheniniń quramyna enetin «Saryarqa» jáne «Dostyq» beketteri uzyndyǵy 3,1 km metro jelisin qamtıtyn qurylys jalǵasýda. Qazir mundaǵy daıyndyq 80%-dy quraıdy. Jyl sońyna deıin trafıkti testilik rejımde iske qosý josparlanýda», dedi B. Saǵyntaev.
Buryn habarlanǵandaı, 3,1 shaqyrym metro jelisi Abaı dańǵyly boıymen Altynsarın dańǵylynan batysqa qaraı Momyshuly kóshesine ótedi.
Qazirgi kezde beketterdi ishki árleý, aýmaqty abattandyrý, syrtqy jáne ishki ınjenerlik jeliler men avtomatıka júıelerin jabdyqtaý, sıgnal berý jáne baılanys, tehnologııalyq jabdyqty (tartqysh-tómen túsiretin qosalqy stansııa, jol qozǵalysyn basqarý júıesin avtomattandyrý, jeldetý jáne t.b.) ornatý jumystary júrýde.
Atalǵan beketterden ózge 2020 jyly uzyndyǵy 2,5 shaqyrymǵa sozylǵan Qalqaman beketi jáne jumys isteıtin tonnelderdi qamtıtyn Almatydaǵy metropolıtenniń ekinshi kezeńiniń úshinshi iske qosý kesheniniń qurylysy bastaldy, onyń quramyna Almaty metropolıteniniń ekinshi kezeńiniń Qalqaman beketi jáne uzyndyǵy 2,5 km qýma tonnelder enedi.
Sonymen qatar, qalanyń keleshektegi damýyn eskere otyryp, batys baǵytta halyqaralyq áýejaıǵa, soltústik jáne ońtústik baǵytta metropolıten salý jobalary qarastyrylýda.
Budan ózge, 8 jańa elektr poıyz sostavtary satyp alynǵan. Eki beket iske qosylsa, onda jolaýshylar aǵyny táýligine 86 myń adamǵa artady dep boljanyp otyr.