El Táýelsizdiginiń 30 jyldyǵyna oraı «Qazaqstan» sport kesheninde QR Tuńǵysh Prezıdenti — Elbasynyń testilerin tapsyrý bastaldy, dep habarlaıdy Egemen.kz qala ákimdiginiń resmı saıtyna silteme jasap.
Jarysqa astanalyq sportshylar, elordanyń Dene shynyqtyrý jáne sport basqarmasynyń jáne qalalyq sport uıymdarynyń qyzmetkerleri qatysýda. Is-sharanyń saltanatty ashylýyna QR Mádenıet jáne sport vıse-mınıstri Erlan Qojaǵapanov, qalalyq Dene shynyqtyrý jáne sport basqarmasynyń basshysy Samat Erǵalıev jáne qalalyq máslıhat hatshysy Erlan Kanalımov qatysty.
«Prezıdenttik testiler Qazaqstanda uzaq jyldar boıy ótkizilip keledi. Olardyń basty maqsaty – ult densaýlyǵy. Bul testilerge jeti jasar baladan bastap, aǵa býynǵa deıingi túrli jastaǵy azamattar qatysa alady. Bul is-shara kóptegen qatysýshylardyń basyn qosty. Ári qajetti sanıtarlyq normalardy saqtaı otyryp ótýde», dedi Erlan Qojaǵapanov.
Prezıdenttik testke qatysýshylardyń arasynda ataqty sportshylar da bar. Olardyń biri – djıý-djıtsýdan Azııanyń eki dúrkin chempıony, Eýropa chempıony jáne álem chempıonatynyń úsh dúrkin júldegeri Galına Dývanova.
Prezıdenttik synaqqa qatysýshylar 7 jas sanaty boıynsha jarysty: 18-23 jas, 24-31 jas, 32-39 jas, 40-49 jas, 50-59 jas, 60-69 jas, 70 jas jáne odan joǵary.
Test sporttyń 7 túrinen ótkiziledi: júgirý, bir orynnan uzyndyqqa sekirý, beltemirge tartylý, keýdeni jatyp kóterý, granata laqtyrý, shaǵyn uńǵylyq (pnevmatıkalyq) vıntovkadan atý jáne 5 metrlik júzý.
Jazǵy sport túrleri boıynsha Prezıdenttik synaqtardy tapsyrý tamyz aıynda aıaqtalady.